Шавкат Мирзиёев 23 апрель куни Қозоғистон президенти Қосим-Жўмарт Тўқаев билан телефон орқали мулоқот қилди. Бу ҳақда Президент матбуот хизмати хабар берди.
Давлат раҳбари қардош Қозоғистон етакчиси ва халқига ушбу мамлакат ҳудудидаги кенг миқёсли тошқинлар натижасида инсонлар қурбон бўлгани муносабати билан ҳамдардлик билдирди. Бундай табиий офатлар кейинги пайтларда минтақада кузатилаётган иқлимнинг салбий ўзгаришлари оқибати экани қайд этилди.
Бу борада яқин амалий ҳамкорликни давом эттиришга келишиб олинди.
Президентлар яқинда Хива шаҳрида бўлиб ўтган учрашувдаги келишувларни амалга ошириш доирасида Ўзбекистон билан Қозоғистон ўртасидаги яхши қўшничилик, стратегик шериклик ва иттифоқчилик муносабатларини янада кенгайтиришнинг долзарб масалаларини муҳокама қилди.
Минтақавий аҳамиятга молик масалалар ва бўлажак олий даражадаги учрашувлар режаси ҳам кўриб чиқилди.
Апрель ойи бошида Қозоғистон вилоятларида сув тошқинлари юз берди. 17 апрелга қадар мамлакатнинг бир қанча ҳудудларида эвакуация эълон қилинди, эвакуация қилинган қозоғистонликлар сони 116 мингдан ошди. Қозоғистон Фавқулодда вазиятлар вазирлиги маълумотларига кўра, 18 апрель ҳолатига кўра республиканинг бешта вилоятида 5,7 минг турар жой биноси ва 1,1 минг томорқа ерлари сув остида қолган. Мамлакатда сув тошқинлари оқибатида 7 киши ҳалок бўлган.
Изоҳ (0)