Тошкент шаҳридаги Бўрижар канали қирғоғида сайилгоҳ ташкил этилиши мумкин

Тошкент шаҳрининг Яккасарой ҳамда Чилонзор туманларидан оқиб ўтувчи Бўрижар канали қирғоқ бўйи ҳудудида сайилгоҳ ташкил этиш ва ободонлаштириш ишларини олиб бориш режалаштирилмоқда. Бу ҳақда пойтахт ҳокимлиги матбуот хизмати хабар берди.

Қайд этилишича, 17 апрель куни Тошкент шаҳар ҳокими Шавкат Умурзоқов каналнинг қирғоқбўйи ҳудудига ташриф буюриб, лойиҳа билан танишган. Ҳоким Экология бошқармаси ва Ўсимликлар карантини давлат инспекцияси мутахассислари иштирокида дарахтларнинг ҳолатини инвентаризация қилиш ва баҳолашдан ўтказиш, шундан сўнг ҳудуддаги дарахтлар кесилмаслиги учун уларнинг ўсаётган жойини ҳисобга олган ҳолда лойиҳага тузатишлар киритиш топшириғини берган.

Ҳоким бошчилигидаги ишчи гуруҳ Бектемир туманидаги олис “Олтинтопган” маҳалласида ҳам бўлган. Бу ерда “Хавфсиз шаҳар, хавфсиз ҳудуд, хавфсиз маҳалла” концепцияси доирасида куз-қиш мавсумига сифатли тайёргарлик кўриш, видеокузатув камераларини ўрнатиш масалалари муҳокама қилинган.

Шунингдек, ҳоким маҳаллада махсус техникалар учун тўхташ жойи, аҳолига қулай ҳудудда жамоат транспорти учун қўшимча бекатлар ташкил этишни буюрган. Ободонлаштириш учун эса самарали, замонавий суғориш тизимини яратиш, ягона код ёрдамида саноат зоналарини замонавий кўринишга келтириш бўйича топшириқлар берган.

Бундан ташқари, шаҳар ҳокими “ҳозирда максимал қувват билан ишлаётган” тозалаш иншоотларини оптималлаштириш бўйича таклифлар билан танишган.

Аввалроқ Тошкент шаҳар ҳокими Шавкат Умурзоқов бошчилигида шаҳар секторлари бошлиқлари, ҳоким ўринбосарлари, тегишли ташкилотларнинг масъулларидан иборат ишчи гуруҳ Бектемир ҳамда Мирзо Улуғбек туманларининг ҳолатини танқидий ўрганиб чиққанди.