Toshkent shahrining Yakkasaroy hamda Chilonzor tumanlaridan oqib o‘tuvchi Bo‘rijar kanali qirg‘oq bo‘yi hududida sayilgoh tashkil etish va obodonlashtirish ishlarini olib borish rejalashtirilmoqda. Bu haqda poytaxt hokimligi matbuot xizmati xabar berdi.
Qayd etilishicha, 17-aprel kuni Toshkent shahar hokimi Shavkat Umurzoqov kanalning qirg‘oqbo‘yi hududiga tashrif buyurib, loyiha bilan tanishgan. Hokim Ekologiya boshqarmasi va O‘simliklar karantini davlat inspeksiyasi mutaxassislari ishtirokida daraxtlarning holatini inventarizatsiya qilish va baholashdan o‘tkazish, shundan so‘ng hududdagi daraxtlar kesilmasligi uchun ularning o‘sayotgan joyini hisobga olgan holda loyihaga tuzatishlar kiritish topshirig‘ini bergan.
.jpg)
Hokim boshchiligidagi ishchi guruh Bektemir tumanidagi olis “Oltintopgan” mahallasida ham bo‘lgan. Bu yerda “Xavfsiz shahar, xavfsiz hudud, xavfsiz mahalla” konsepsiyasi doirasida kuz-qish mavsumiga sifatli tayyorgarlik ko‘rish, videokuzatuv kameralarini o‘rnatish masalalari muhokama qilingan.
Shuningdek, hokim mahallada maxsus texnikalar uchun to‘xtash joyi, aholiga qulay hududda jamoat transporti uchun qo‘shimcha bekatlar tashkil etishni buyurgan. Obodonlashtirish uchun esa samarali, zamonaviy sug‘orish tizimini yaratish, yagona kod yordamida sanoat zonalarini zamonaviy ko‘rinishga keltirish bo‘yicha topshiriqlar bergan.
Bundan tashqari, shahar hokimi “hozirda maksimal quvvat bilan ishlayotgan” tozalash inshootlarini optimallashtirish bo‘yicha takliflar bilan tanishgan.
Avvalroq Toshkent shahar hokimi Shavkat Umurzoqov boshchiligida shahar sektorlari boshliqlari, hokim o‘rinbosarlari, tegishli tashkilotlarning mas’ullaridan iborat ishchi guruh Bektemir hamda Mirzo Ulug‘bek tumanlarining holatini tanqidiy o‘rganib chiqqandi.
Izoh (0)