Ўзбекистоннинг Буюк Британиядаги элчиси Равшан Усманов “Интертек” компаниясининг ҳукумат ва савдо хизматлари бўйича вице-президенти Жереми Гаспард билан учрашув ўтказди. Бу ҳақида “Дунё” АА хабар берди.
Маълум қилинишича, компания нефть-газ, энергетика, автомобиль саноати, қурилиш, электроника, озиқ-овқат саноати, тиббиёт ва бошқа соҳаларда маҳсулот ҳамда хизматлар сифатини назорат қилиш, хавфсизлигини таъминлаш ва стандартлаштириш йўналишида жаҳонда етакчи саналади. “Интертек”нинг 100 дан ортиқ мамлакатларда 1000 дан зиёд офислари, лабораториялари ва сертификация марказлари бор.
Суҳбат давомида республикада ишлаб чиқарилаётган маҳсулотларнинг экспорт ҳажмини ошириш мақсадида “Интертек” компанияси билан уларни халқаро стандартлар асосида сертификатлаш, ёрлиқлаш ва ўраш йўналишида ҳамкорлик қилиш масалалари муҳокама қилинди.
Вице-президент Жереми Гаспард “Интертек” компанияси Ўзбекистон томони билан республикада ишлаб чиқарилаётган қурилиш, шу жумладан, базалт маҳсулотлари, электротехника, текстиль ва озиқ-овқат товарларини халқаро стандартларга (EN, ASTM, ISO ва бошқалар) мувофиқ сертификатлаш йўналишида ҳамкорлик ўрнатишдан манфаатдор эканини таъкидлади.
Музокаралар якунида Ўзбекистон техник жиҳатдан тартибга солиш агентлиги ва “Интертек” компанияси ўртасида ҳамкорлик ўрнатиш бўйича келишувга эришилди.
Изоҳ (0)