Uzum Market сотувчилар учун комиссияларни ҳисоблаш механикасини ўзгартиради

1 майдан бошлаб Uzum Market миллий маркетплейси сотувчилар учун комиссия миқдори аввалгидек товар қийматига эмас, балки унинг тоифасига боғлиқ бўлади.

Янги механика миллий платформага сотувчилар учун қулай ва шаффоф шароитларни таъминлаш учун комиссияларни янада мослашувчан равишда бошқариш имконини беради.

Платформанинг комиссия миқдори товарлар тоифасига қараб 3% дан 35% гача бўлади, Uzum Marketдаги комиссиялар нафақат Ўзбекистонда, балки МДҲ мамлакатларидаги маркетплейслар орасида ҳам энг пастларидан бири бўлиб қолмоқда. 

— Ишлаб чиқарувчилар ва сотувчиларнинг устама нархи биринчи навбатда товарлар тоифасига боғлиқ, шунинг учун бундай механика сотувчиларга товарларнинг маржиналлигини янада самарали ҳисоблаш ва ўз бизнесларини платформамизда ривожлантириш имконини беради, — дейди Uzum Market бош директори Илшат Хаметов. — Деярли барча глобал маркетплейслар шунга ўхшаш принципдан фойдаланади, чунки бу онлайн жавонларда тақдим этилган ўнлаб тоифадаги товарларнинг ҳар бирининг хусусиятларини ҳисобга олишга имкон беради. 

Комиссияларни ҳисоблашнинг янги механикаси 1 майдан кучга киради, шунда сотувчилар дўкон иқтисодиётини қайта ҳисоблаш ва янги харидларни режалаштириш учун етарли вақтга эга бўладилар. Шунингдек, 1 майдан бошлаб миллий маркетплейс товарларни етказиб бериш учун товар қиймати ва габаритига қараб 2000 дан 20 000 сўмгача (катта габаритли товарлар учун) қайд этилган логистика йиғимини жорий этади. Тўлов фақат харидор товарларни Uzum Market тарқатиш пунктидан ёки куреридан олган тақдирдагина ундирилади. 

Бугунги кунда Uzum Marketда мамлакатнинг барча ҳудудларидан 10 000 дан ортиқ сотувчилардан 600 мингдан ортиқ ноёб товар номлари тақдим этилган. Миллий маркетплейс буюртма тарқатиш пунктлари мамлакат бўйлаб 72 та аҳоли пунктларида ишлайди. Бу йил миллий маркетплейс мамлакатдаги энг йирик логистика мажмуасининг биринчи навбатини ишга туширади, шунингдек, 10 мингдан ортиқ аҳолиси бўлган мамлакатнинг барча аҳоли пунктларини қамраб олган ҳолда тарқатиш пунктлари тармоғини 1000 дан ортиқ пунктларга кенгайтиришни режалаштирмоқда.

Шериклик ҳуқуқи асосида.