Исроил ҳарбийлари 12 апрель куни босиб олинган Ғарбий Соҳилдаги Тубас шаҳрига ҳужум уюштириб, 2 нафар ҲАМАС аъзосини йўқ қилган. Бу ҳақда CNN нашри хабар берди.
Хабарда айтилишича, ҳужумда Исроил қўшинлари ҲАМАС аъзолари — Муҳаммад Эссам Шоҳмавий ва Муҳаммад Умар Дарагмеҳни ўлдирган. Фаластин нашрлари ҳам ушбу хабарни тасдиқлаган.
Исроил кучлари ҳалок бўлганлар минтақадаги марказий шахслардан бўлганлиги ва сўнгги ойларда Исроилга қарши муҳим террор ҳужумларини режалаштирганини маълум қилган. Ҳарбийлар ҳалок бўлганларнинг машинасидан қурол-яроғ топилиб, мусодара қилинганини билдирган.
Фаластин Қизил ярим ой Жамияти CNN телеканалига маълум қилишича, яна камида уч киши дайди ўқдан яраланган. Улардан бири оғир аҳволда.
Рамаллоҳдаги Фаластин Соғлиқни сақлаш вазирлиги маълумотларига кўра, Исроил кучлари шу пайтга қадар босиб олинган Ғарбий Соҳил ва Шарқий Қуддусда камида 462 нафар фаластинликни ўлдирган. 4700 га яқин одам жароҳат олган.
Изоҳ (0)