Ўзбекистонда ер олган ёшларга 100 млн сўмгача кредит ажратилади 

Ўзбекистонда президент қарори билан ер олган ёшларга 100 миллион сўмгача кредит ажратилади. Бу ҳақда Адлия вазирлиги хабар берди. 

Қарорга кўра, қишлоқ хўжалиги маҳсулотларини етиштиришдан сотишгача бўлган занжирни қамраб олувчи янги тизим бўйича талабгорларни қўллаб-қувватлаш чоралари жорий этилади.

Хусусан, қарорда назарда тутилган шартларда ва маблағлар доирасида талабгорларга тижорат банклари томонидан 7 йилгача муддатга 100 миллион сўмгача кредит ажратиш. Бунда, қарор доирасида барча турдаги кредитларни “маҳалла еттилиги”нинг кафиллиги асосида ажратишга рухсат берилади ҳамда улар кредитларнинг натижадорлиги учун тенг жавобгар бўлади.

Шунингдек, талабгорларга мини-техника, уруғ ва кўчат харидига “Ёшлар дафтари” жамғармасидан 5 миллион сўмдан субсидия, Фермер, деҳқон хўжаликлари ва томорқа ер эгаларини қўллаб-қувватлаш жамғармасидан 33 миллион сўмгача кредит ажратилади.

Жойлардаги 167 та Агромарказлар орқали хусусий секторни жалб этган ҳолда уруғ, кўчат етказиш, минерал ўғит бериш, мини-техника ва агроном хизматлари йўлга қўйилади ҳамда етиштирилган маҳсулотни харид қилишга қайта ишловчилар ва экспорт қилувчилар бириктирилади.