Муборак тумани Мактабгача ва мактаб таълими бўлими бошлиғига суд ҳукми ўқилди

Қашқадарё вилояти Муборак тумани Мактабгача ва мактаб таълими бўлими бошлиғига суд ҳукм ўқилди. Бу ҳақда Nasafnews хабар берди.

Келтирилишича, 5 март куни Жиноят ишлари бўйича Косон тумани судида И.У., Ж.Э., О.Ч. ва бошқаларга оид жиноят иши кўрилган. Ҳукмга мувофиқ, Муборак тумани Мактабгача ва мактаб таълими бўлими бошлиғи И.У. Жиноят кодексининг 207-моддаси 1-қисмида (мансабга совуққонлик билан қараш) назарда тутилган жиноятларни содир этганликда айбли деб топилган. 

Унга Жиноят кодексининг 207-моддаси 1-қисми (мансабга совуққонлик билан қараш) билан Жиноят кодексининг 45-моддасига асосан давлат органи ёки давлат иштирокидаги ташкилотларда моддий жавобгарлик ва мансабдорлик вазифаларида ишлаш ҳуқуқидан 1 йил муддатга маҳрум қилиниб, иш ҳақининг 20 фоизи миқдорини давлат даромади ҳисобига ушлаб қолган ҳолда 1 йил ахлоқ тузатиш ишлари жазоси тайинланган ва бошқа шахсларга ҳам тегишли тартибда жазо тайинланган. 

Ҳолат юзасидан вилоят Мактабгача ва мактаб таълими бошқармаси матбуот хизмати 5 март куни Жиноят ишлари бўйича Косон тумани судининг ҳукми ва тегишли ҳужжатлар билан Мактабгача ва мактаб таълими вазирлигига хат билан йўналтирилганини маълум қилган. 

Шунингдек, туман Мактабгача ва мактаб таълими бўлими бошлиғи И.У. билан суҳбатда ҳукм нотўғри бўлганини билдириб, Қашқадарё вилояти суди Жиноят ишлари бўйича судлов ҳайъатига аппеляция берганини маълум қилди.