Muborak tumani Maktabgacha va maktab ta’limi bo‘limi boshlig‘iga sud hukmi o‘qildi

Qashqadaryo viloyati Muborak tumani Maktabgacha va maktab ta’limi bo‘limi boshlig‘iga sud hukm o‘qildi. Bu haqda Nasafnews xabar berdi.

Keltirilishicha, 5-mart kuni Jinoyat ishlari bo‘yicha Koson tumani sudida I.U., J.E., O.CH. va boshqalarga oid jinoyat ishi ko‘rilgan. Hukmga muvofiq, Muborak tumani Maktabgacha va maktab ta’limi bo‘limi boshlig‘i I.U. Jinoyat kodeksining 207-moddasi 1-qismida (mansabga sovuqqonlik bilan qarash) nazarda tutilgan jinoyatlarni sodir etganlikda aybli deb topilgan. 

Unga Jinoyat kodeksining 207-moddasi 1-qismi (mansabga sovuqqonlik bilan qarash) bilan Jinoyat kodeksining 45-moddasiga asosan davlat organi yoki davlat ishtirokidagi tashkilotlarda moddiy javobgarlik va mansabdorlik vazifalarida ishlash huquqidan 1 yil muddatga mahrum qilinib, ish haqining 20 foizi miqdorini davlat daromadi hisobiga ushlab qolgan holda 1 yil axloq tuzatish ishlari jazosi tayinlangan va boshqa shaxslarga ham tegishli tartibda jazo tayinlangan. 

Holat yuzasidan viloyat Maktabgacha va maktab ta’limi boshqarmasi matbuot xizmati 5-mart kuni Jinoyat ishlari bo‘yicha Koson tumani sudining hukmi va tegishli hujjatlar bilan Maktabgacha va maktab ta’limi vazirligiga xat bilan yo‘naltirilganini ma’lum qilgan. 

Shuningdek, tuman Maktabgacha va maktab ta’limi bo‘limi boshlig‘i I.U. bilan suhbatda hukm noto‘g‘ri bo‘lganini bildirib, Qashqadaryo viloyati sudi Jinoyat ishlari bo‘yicha sudlov hay’atiga appelyatsiya berganini ma’lum qildi.