Тошкент вилоятининг 19 729,41 гектар ер майдони Тошкент шаҳридаги Янги Тошкент тумани таркибига ўтказилди. Бу ҳақдаги тегишли қарор Тошкент вилояти ҳокими Зоир Мирзаев томонидан имзоланган.
Қарорга кўра, Тошкент вилояти ҳудудидан 19 729,41 гектар, шу жумладан Юқори Чирчиқ туманидан 17 323,32 гектар, Ўрта Чирчиқ туманидан 2 406,1 гектар ер майдонлари Тошкент шаҳрининг Янги Тошкент тумани таркибига ўтказилди.
Тошкент вилоятининг Юқори Чирчиқ туманидаги 33 та МФЙ, шундан 20 та тўлиқ, 13 та қисман ҳамда Ўрта Чирчиқ туманидаги 7 та МФЙ, шундан 4 та тўлиқ, 3 та қисман бўлган ҳудудлари Тошкент шаҳри таркибидаги Янги Тошкент туманига ўтказилиши белгиланди.
2023 йилнинг ноябрь ойида Тошкент шаҳри таркибида Янги Тошкент тумани ташкил этилиши ҳақида хабар берилган эди.
Аввалроқ 500 минг аҳолига мўлжалланган Янги Тошкент шаҳри Чирчиқ ва Қорасув дарёлари оралиғида барпо этилиши тўғрисида хабар берилганди. 2023 йилнинг 18 март куни Шавкат Мирзиёев “Янги Тошкент” лойиҳаси қурилишига тамал тошини қўйган.
Изоҳ (0)