Янги Тошкент лойиҳасида 420 гектар майдонда “Марказий боғ” барпо этилиб, 200 минг туп дарахт экилади

Янги Тошкент лойиҳасида 420 гектар майдонда “Марказий боғ” барпо этилиб, 200 минг туп дарахт экилади. Бу ҳақда бугун, 27 февраль куни “Qurilish — Uzbuild-2024” халқаро кўргазмаси доирасида бўлиб ўтган “Ўзбекистонда бунёдкорлик. Янги Тошкент — табиат ва келажак шаҳри” мавзусида конференцияда таъкидланган. 

Қурилиш ва уй-жой коммунал хўжалиги вазирлиги матбуот хизматининг маълум қилишича, конференцияда Янги Тошкентни қуриш концепцияси, жараёнга жорий этилган янги, инновацион ечимлар, аҳоли учун яратиладиган қулай инфратузилма ва шароитлар хусусида тақдимот ўтказилган. Хабарга кўра, ҳудудда 420 гектар майдонда “Марказий боғ” барпо этилиб, 200 минг туп дарахт экилади.

Янги Тошкент мегалойиҳасини амалга оширишда энг замонавий экологик транспорт тизимидан фойдаланилади. Янги Тошкентда метро ва электробуслар уйғунликда ҳаракатланади. Бунда “яшил ва хавфсиз шаҳар” тамойили асосида, пиёдалар ва велосипедларнинг эркин ҳаракатланиши учун қулай шароит яратилади. Шу мақсадда 100 минг автомобиль учун ер ости тураргоҳлари қурилади. Автомобиль қатнови учун 14 та замонавий тунеллар ҳамда Чирчиқ ва Қорасув дарёлари устида 7 та кўприк бунёд этилади. 

Марказий Осиёда илк бор “уч-генерация” станциясининг қурилиши орқали электр ишлаб чиқарилади, бинолар куз-қишда иситилади, ёзда эса совитилади. Барча электр, алоқа тармоқлари, газ ва сув қувурлари ер тагидан ўтказилади. Сув тежовчи технологияларни қўллаш ҳисобига сув сарфи 2 баравар камаяди. Оқова сувлар замонавий технологиялар асосида қайта ишланиб, суғориш ва техник мақсадлар учун йўналтирилади.

Cross Works компанияси ижрочи директори Ҳакан Агканинг айтишича, компания пойтахт келажаги учун бош режани яратиш устида иш олиб бормоқда. 

“Мазкур мегалойиҳани амалга оширишда етакчи маслаҳатчи ва бош режачи сифатида танланганимиздан жуда мамнунмиз. Муҳим ва масъулиятли жараён биздан муҳандислик, ободонлаштириш, иқтисодий прогнозлар ва бошқа кўплаб йўналишларда энг илғор компаниялар билан ҳамкорликни талаб қилди. Бош режа келгуси аср давомида қуриладиган етти тумандан иборат бўлиб, бунда тахминан 2,5 миллиондан зиёд аҳолини қамраб олиш режаланган. Янги шаҳарнинг бир қанча асосий мақсадлари бор. Бунда энг бирламчиси — аҳоли сонининг ўсиш суратини режали ва ўйланган тарзда амалга оширилиши ҳамда Янги Тошкентни келажак авлод учун хавфсиз ҳамда қулай маконга айлантириш”, — деган у.

Таъкидланишича, 20 минг гектар майдонда 1 миллион аҳоли учун қулай шароит ва энг мақбул инфратузилмада 100 минг аҳолига мўлжалланган кўп қаватли уйлар, 30 та мактаб, 20 та болалар боғчаси, кўп тармоқли касалхона ва 5 та оилавий поликлиника қурилади.