“Одамлар хафа бўлса бўлсин, пулни болангизга сарфланг”.  Сурхондарё ҳокими Россияда ишлаб келганлар дабдабали тўй қилишини қоралади

Сурхондарё вилояти ҳокими Улуғбек Қосимов ўзбек мигрантининг Россияга бориб, йиллаб қора меҳнат қилиб, топиб келган пулига дабдабали тўй қилишини қоралаб, фарзанди келажаги учун сармоя киритмаслигини қоралади. 

Россиядан келган пулни йиғиб-йиғиб, беш минг доллар қилиб олгач, нима қиламиз? Битта тўйхонани гаплашиб, тўй қиламиз. Ўша беш минг долларни боласининг ўқишига тиксин. Тўйни 200-300 долларга ўтказиб, қолган пулни боласининг келажаги учун сарфласин. Эртага ўша пул шундай қайтади, — дейди ҳоким. 

“Дарё” журналисти тармоқларда тарқалган видеога аниқлик киритиш мақсадида ҳокимлик ахборот хизмати раҳбари Муродбек Давлатов билан боғланди. 

Масъулниннг билдиришича, Улуғбек Қосимов бу ҳақида вилоятнинг Сариосиё туманидаги Тожикистон билан чегарада жойлашган “Шоқишлоқ” маҳалласи аҳолиси билан мулоқотда гапирган. 

Россияга бориб, ўлгудек ишлаяпмиз, пулни жўнатяпти, хотини йиғиб туради. Келади, битта уй қуради, битта мошина олади. Шартта тўйни қилиб, қайтиб кетади. У бола ўқияптими-ўқимаяптими ҳеч кимнинг иши йўқ, — дейди Сурхондарё вилояти ҳокими. 

Вилоят раҳбари Ўзбекистон ёшлари билимга чанқоқлигини, ўқиб, ўзгаларни ишлатиш лаёқатига эгалигини айтади. 

Қачонгача биз Россияга бориб ишлаб келамиз. Биз ишлатишимиз керак. Ҳаммамизнинг ақл-ҳушимиз жойида. Мияси бутун болалар кўп. Ҳеч ким бирдан бутун дунёни бошқарадиган бўлиб қолмайди. Секин-аста бўлади. Болаларнинг ўқишига қизиқишимиз керак. Бир сўм пул топсак ҳам болалар келажаги учун ишлатишимиз керак, — дейди вилоят ҳокими.