Нурафшон шаҳар ҳудудида Зулфия Зокирова номидаги меъмориал мажмуа қурилади. Бу ҳақда Тошкент вилояти ҳокими Зоир Мирзаев тегишли фармойишни имзолади.
Мазкур доирадаги ишларни амалга ошириш учун вилоят маҳаллий бюджетининг 2024 йил бошига шаклланган эркин қолдиқ маблағлари ҳисобидан 1 миллиард сўм миқдорда маблағ ажратилган.
2021 йилнинг ноябрь ойида ўша вақтдаги Тошкент вилояти ҳокими Даврон Ҳидоятовнинг фармойишига кўра, Нурафшон шаҳрида Зулфия Зокирова номига ҳайкал мажмуасини қуриш ва атрофини ободонлаштириш ишлари учун 28,4 миллиард сўм ажратилган эди.
Айни 2021 йилнинг ноябрь ойида Тошкент вилояти ҳокими этиб тайинланган Зоир Мирзаев Зулфия Зокирова номига ҳайкал мажмуасини қуриш ва атрофини ободонлаштириш ҳамда Нурафшон Business Cитй ҳудудида замонавий кутубхона биносини қуриш тўғрисидаги қарорни бекор қилган эди.
Кейинроқ вилоят ҳокимлиги лойиҳа бекор қилинмагани, фақат кечиктирилганини маълум қилганди.
Маълумот учун, Зулфия Зокирова Иккинчи жаҳон урушида бешта ўғлини йўқотган она ҳисобланади. Зулфия Зокирова тақдири акс этган “Илҳақ” фильми суратга олинган. Тошкентдаги Ғалаба боғида илк ҳайкали ўрнатилган.
Изоҳ (0)