Ўзбекистон 2030 йилгача 30 миллиард долларлик давлат – хусусий шериклик лойиҳаларини амалга оширмоқчи. Бу ҳақда президентнинг иқтисодий ривожланиш масалалари бўйича маслаҳатчиси Равшан Ғуломов маълум қилди, дея хабар бермоқда “Дарё” мухбири.
Бугун, 29 февраль куни Тошкент шаҳрида Иқтисодиёт ва молия вазирлиги ҳамда Халқаро молия корпорацияси ҳамкорлигида “Ўзбекистон – 2030” стратегиясида давлат – хусусий шерикликни (ДХШ) ривожлантириш мақсадларига доир давра суҳбати ўтказилмоқда.
Мулоқотда 200 дан ортиқ давлат органлари вакиллари, маҳаллий ва халқаро молия институтлари экспертлари ҳамда инвесторлар иштирок этмоқда.
Тадбирда президент маслаҳатчиси Равшан Ғуломов 2030 йилгача Ўзбекистон ялпи ички маҳсулотини 160 миллиард долларга етказиш мақсад қилингани, бу натижага эришишда хусусий секторнинг фаол иштироки муҳимлигини айтди.
Келгуси 6 йилда ялпи ичи маҳсулотимизни аҳоли жон бошига 4 минг доллардан оширишни ва шу орқали ўрта юқори даромадли мамлакатлар қаторига қўшилишни режалаштирганмиз. Бундай ўсишни рағбатлантириш учун бозор ислоҳотлари, хусусий секторнинг фаол иштироки ва қўшимча инвестициялар талаб этилади. Шунинг учун президент томонидан 2030 йилга қадар 30 миллиард долларлик ДХШ асосидаги лойиҳаларни амалга ошириш вазифаси белгилаб берилган. Республикамизда ДХШ йўналиши 5 йил аввал бошланган. Ҳозиргача бу соҳада жами 17 миллиард долларлик, мингдан зиёд лойиҳалар амалга оширилиб келинмоқда. Айниқса, электр энергияси ишлаб чиқариш, қайта тикланувчи энергия манбаларига ўтишга ДХШ энг катта ҳисса қўшмоқда”, — деди президент маслаҳатчиси.
Давра суҳбатида экспертлар мамлакатда ДХШ соҳасини ривожлантиришда нималарга эътибор қаратиш зарурлиги борасида фикр–мулоҳазаларини билдирмоқда. Иқтисодиёт ва молия вазирлиги мулоқотдан олинган ғоя ва тавсияларни амалиётга татбиқ этиш ниятида эканини маълум қилди.
Изоҳ (0)