Республика бўйича фаолият юритаётган хусусий корхоналар сони 2023 йилдаги 89 170 тадан ҳозирги 63 465 тагача камайди. Бу ҳақда Статистика агентлиги эълон қилган мамлакатдаги корхона ва ташкилотлар демографияси бўйича пресс-релизда ёзилган.
2024 йилнинг 1 февраль ҳолатига кўра, Ўзбекистондаги жами хусусий корхоналар сони 63 465 тани ташкил этган. Хусусий корхоналарнинг 27 944 таси савдо соҳасида, 9 750 та саноат, 5 192 таси яшаш ва овқатланиш бўйича хизматлар ҳамда 4 161 таси қурилиш соҳасида фаолият юритмоқда.
Мамлакат бўйича энг кўп хусусий корхоналар Тошкент шаҳрида қайд этилган — 8 094 та. Шу билан бирга, Фарғона (7 848 та) ҳамда Қашқадарё (7 608 та) вилоятларидаги хусусий корхоналар сони бошқа ҳудудлардагига қараганда сезиларли кўп.
Қолган ҳудудлардаги корхоналар сони қуйидагича:
Самарқанд вилояти — 5 610 та;
Сурхондарё вилояти — 5 201 та;
Хоразм вилояти — 4 889 та;
Навоий вилояти — 4 487 та;
Тошкент вилояти — 4 167 та;
Наманган вилояти — 4 010 та.
Қолган ҳудудлардаги хусусий корхоналар сони 3 000 тага етмайди. Масалан, Бухорода 2 857 та, Жиззахда 2 719 та, Андижонда 2 380 та, Қорақалпоғистонда 2 347 та хусусий корхона фаолият юритмоқда. Республикада энг кам хусусий корхоналар Сирдарё вилояти – 1 248 та.
Агентлик келтирган рақамларга кўра, 2023 йилда Ўзбекистонда жами 89 170 та хусусий корхона фаолият юритган бўлган. 2024 йилга келиб уларнинг сони қарийб 25 705 тага камайган.
Изоҳ (0)