Германиянинг Билефельд университети 26 февраль куни ўз веб-сайтида университет кутубхонасидаги антиквар нашрларда юқори концентрацияли мишяк (маргимуш) бўлиши мумкинлиги ҳақида хабар чоп этди.
Университет раҳбарияти 60 минг китоб ва журналнинг чиқарилишини вақтинча чеклашга қарор қилган.
“Кутубхоналар жиддий муаммога дуч келмоқда: ХIX асрда китоб ва журналлар ишлаб чиқаришда баъзан мишяк бирикмалари қўлланилган. Бу Билефельд университети кутубхонаси коллекцияларидаги нашрларга ҳам тааллуқли деб ўйлаймиз” — дейилади ректорат хабарида.
Шунингдек, мишяк ёки арсен заҳарли модда эканлиги, унинг инсон организмида хатарли ўсмалар хавфини ошириши аниқланган. У чоп этишда ишлатиладиган яшил бўёқларда бўлиши мумкин. Тадқиқотларга кўра, жавонларда турган китоблар зарарсиз ҳисобланади.
“Яшил бўёқ билан бўялган элементларга тегиш ва ҳўлланган бармоқлар билан саҳифаларни варақлашда потенциал хавф туғилиши мумкин”, — дейилади баёнотда.
Университет раҳбарияти кутубхона фондидаги ХIX аср нашрларининг 10 фоиздан камроғи ҳақиқатда соғлиқ учун хавфли бўлиши мумкинлигини тахмин қилмоқда. Шунга қарамай, тегишли даврдаги барча 60 минг китоб ва журналларнинг чиқарилишини вақтинча чеклашга қарор қилди. Хавфсиз нашрлар яна ўқувчиларга тақдим этилади.
Ҳозирда Германияда китоблар орқали мишяк билан заҳарланиш хавфи бўйича ҳеч қандай қонуний қоидалар ёки тавсиялар мавжуд эмас. ОАВ хабарларига кўра, кўплаб немис кутубхоналари, шунингдек, Дания ва бошқа Европа мамлакатларидаги кутубхоналар ҳам мазкур муаммога дуч келмоқда.
Изоҳ (0)