Дания университетида ўлимга олиб келувчи заҳар билан қопланган китоблар топилди

Жанубий Дания университети кутубхонасида кучли заҳар билан қопланган китоблар топилди, деб ёзади Sky News.

Олимлар муқовалашда Ўрта асрларга тегишли номаълум қўлёзмалардан фойдаланилган, XVI—ХVII асрларга оид учта китобга қизиқиб қолди. Ўрганиш жараёнида мутахассислар қалин яшил бўёқ қатлами туфайли, лотин тилидаги матнларни ўқиш қийинлашаётганини пайқади.

Тадқиқот унинг бўёқ эмас, ўлимга олиб келувчи хавфли заҳар эканлигини кўрсатди. «Биз яшил юзага рентгент нурини қаратганимизда, ақлбовар қилмас даражада кўп миқдордаги маргимуш (мишяк)ни кўрдик», — деди университет доценти Кааре Лунд Расмуссен.

Айни пайтда китоблар шамоллатиладиган жавонга қўйилган. Олимлар заҳар билан алоқада бўлмаслиги учун, улар сканерлаб олинади.

Фаразлардан бирига кўра, китобларни ҳашарот ва кемирувчилардан ҳимоя қилиш учун, уларнинг муқовасига маргимуш сурилган.