Халқ депутатлари Қашқадарё вилояти кенгаши котибияти масъули ва ўқитувчи интернетдаги изоҳи сабаб жавобгарликка тортилди

Қашқадарёда Халқ депутатлари вилоят кенгаши котибияти бош мутахассиси ва мактаб ўқитувчиси интернетда фуқаронинг шахсий ҳаёт даҳлсизлигига зид фикрлар билдиргани ва ҳақорат қилгани учун жавобгарликка тортилди. Бу ҳақда “Дарё” мухбири хабар берди. 

“Дарё” интернет нашрида “Баданида қонталашлар бор, ъдомъдан ташлаб юбориш билан қўрқитилган: Қаршида олти ёшга ҳам тўлмаган бола қийноққа солинаётгани айтилмоқда” сарлавҳали мақола эълон қилинган бўлиб, унда қаршилик отанинг фарзанди тақдиридан хавотирда эканини айтгани ҳикоя қилинганди. Мазкур мақола нашрнинг YouTube’даги каналида видео шаклида ҳам оммага намойиш қилинганди. 

Таҳририят мухбирининг аниқлаштиришича, Халқ депутатлари вилоят кенгаши котибияти бош мутахассиси сифатида фаолият юритувчи Ф.С. мазкур видеонинг изоҳ қисмида боланинг отасини ҳақоратлаб, Улуғбек Азизовнинг шахсий ҳаёт даҳлсизлигига зид фикрлар билдирган. 

Мазкур изоҳларни кузатиб борган Улуғбек Азизов интернетда унинг шахсий ҳаёти даҳлсизлигига зид фикрлар билдирган Ф.С. устидан аввалига ИИБга, кейин судга шикоят киритган. 

Жиноят ишлари бўйича Қарши шаҳар суди 2024 йилнинг 6 февраль куни мурожаатчи шикоятига асосан Халқ депутатлари Қашқадарё вилояти кенгаши котибиятида ишловчи фуқаронинг хатти-ҳаракатига ҳуқуқий баҳо берган. 

Ҳуқуқбузар судда айбига иқрорлигини, ҳақорат қилинган ота — Улуғбек Азизовни танимаслигини, аммо унинг собиқ турмуш ўртоғи билан бирга ишлашини, шу сабаб интернетда фарзандининг тақдиридан хавотир олиб чиқиш қилган отани ҳақоратлаганини, унинг шахсий ҳаётига даҳл қилувчи маълумотни ёзганини тан олиб, бундан пушаймонлигини, фуқародан кечирим сўрашини билдириб, суддан енгиллик сўраган. 

Судда, шунингдек, яна бир фуқаро — Қарши шаҳридаги 28-мактабда ўқитувчи сифатида ишлаб келган аёл Э.Ҳ.нинг ҳам ҳаракатига баҳо берилган. 

Суд ҳужжатларида ёзилишича, ҳуқуқбузар аёл мактабда ўқитувчи бўлиб ишлашига қарамасдан интернетдаги видеога Улуғбек Азизовни ҳақорат қилиб, изоҳ ёзган.

Судда сўроқ қилинган ўқитувчи аслида Улуғбек Азизовни танимаслигини, унинг собиқ турмуш ўртоғини танишини айтиб, шу сабаб изоҳ ёзганини, қилмишидан пушаймонлигини билдирган. Ва у ҳам суддан енгиллик сўраган. 

Суд ҳар икки ҳуқуқбузар — Халқ депутатлари вилоят кенгаши котибияти бош мутахассиси ва Қарши шаҳридаги 28-мактаб ўқитувчисини айбдор деб топиб, уларнинг ҳар бирига базавий ҳисоблаш миқдорининг 3 баравари — 1 миллион 20 минг сўм жарима жазоси тайинлаган.