Qashqadaryoda Xalq deputatlari viloyat kengashi kotibiyati bosh mutaxassisi va maktab o‘qituvchisi internetda fuqaroning shaxsiy hayot dahlsizligiga zid fikrlar bildirgani va haqorat qilgani uchun javobgarlikka tortildi. Bu haqda “Daryo” muxbiri xabar berdi.
“Daryo” internet nashrida “Badanida qontalashlar bor, ‘dom’dan tashlab yuborish bilan qo‘rqitilgan: Qarshida olti yoshga ham to‘lmagan bola qiynoqqa solinayotgani aytilmoqda” sarlavhali maqola e’lon qilingan bo‘lib, unda qarshilik otaning farzandi taqdiridan xavotirda ekanini aytgani hikoya qilingandi. Mazkur maqola nashrning YouTube’dagi kanalida video shaklida ham ommaga namoyish qilingandi.
Tahririyat muxbirining aniqlashtirishicha, Xalq deputatlari viloyat kengashi kotibiyati bosh mutaxassisi sifatida faoliyat yurituvchi F.S. mazkur videoning izoh qismida bolaning otasini haqoratlab, Ulug‘bek Azizovning shaxsiy hayot dahlsizligiga zid fikrlar bildirgan.
Mazkur izohlarni kuzatib borgan Ulug‘bek Azizov internetda uning shaxsiy hayoti dahlsizligiga zid fikrlar bildirgan F.S. ustidan avvaliga IIBga, keyin sudga shikoyat kiritgan.
Jinoyat ishlari bo‘yicha Qarshi shahar sudi 2024-yilning 6-fevral kuni murojaatchi shikoyatiga asosan Xalq deputatlari Qashqadaryo viloyati kengashi kotibiyatida ishlovchi fuqaroning xatti-harakatiga huquqiy baho bergan.
Huquqbuzar sudda aybiga iqrorligini, haqorat qilingan ota — Ulug‘bek Azizovni tanimasligini, ammo uning sobiq turmush o‘rtog‘i bilan birga ishlashini, shu sabab internetda farzandining taqdiridan xavotir olib chiqish qilgan otani haqoratlaganini, uning shaxsiy hayotiga dahl qiluvchi ma’lumotni yozganini tan olib, bundan pushaymonligini, fuqarodan kechirim so‘rashini bildirib, suddan yengillik so‘ragan.
Sudda, shuningdek, yana bir fuqaro — Qarshi shahridagi 28-maktabda o‘qituvchi sifatida ishlab kelgan ayol E.H.ning ham harakatiga baho berilgan.
Sud hujjatlarida yozilishicha, huquqbuzar ayol maktabda o‘qituvchi bo‘lib ishlashiga qaramasdan internetdagi videoga Ulug‘bek Azizovni haqorat qilib, izoh yozgan.
Sudda so‘roq qilingan o‘qituvchi aslida Ulug‘bek Azizovni tanimasligini, uning sobiq turmush o‘rtog‘ini tanishini aytib, shu sabab izoh yozganini, qilmishidan pushaymonligini bildirgan. Va u ham suddan yengillik so‘ragan.
Sud har ikki huquqbuzar — Xalq deputatlari viloyat kengashi kotibiyati bosh mutaxassisi va Qarshi shahridagi 28-maktab o‘qituvchisini aybdor deb topib, ularning har biriga bazaviy hisoblash miqdorining 3 baravari — 1 million 20 ming so‘m jarima jazosi tayinlagan.
Izoh (0)