Актриса фақат бешта фильмда суратга тушган — ҳаммаси ёшлик чоғида, кейин эса экранлардан ғойиб бўлади. Бу йиллар давомида у икки марта турмушга чиқиб, она бўлади ва севимли Алиса Селезнёвадан жиддий олимага айланади.
Наталья Гусева “Келажакдан келган меҳмон” фильмида суратга тушганда атиги 12 ёшда эди. Алиса Селезнёва унинг карьерасидаги иккинчи роль бўлади. Шу пайтгача ҳатто театр студиясига ҳам бормаган қиз фақат Совет Иттифоқининг эмас, балки бошқа мамлакат томошабинларининг ҳам севимлисига айланади. Фильмдан кейин узоқ йиллар давомида Гусевага мухлислардан унинг ажойиб кўзлари ва истеъдоди учун миннатдорлик билдирилган, унинг буюк актриса бўлиши башорат қилинган минглаб хатлар келган.
Лекин бирданига қандай пайдо бўлган бўлса, шундай кутилмаганда Наталья экранлардан йўқолади: у суратга тушишни тўхтатади, интервьюлар бермай қўяди ва актрисалик фаолиятини биокимё соҳасига алмаштиради. Ўшандан бери у шахсий ҳаётини оммадан сир сақлайди, аммо у ҳақида баъзи нарсалар маълум. 2024 йилнинг 15 февралида Наталья Гусева 52 ёшини турмуш ўртоғи ва икки қизи даврасида нишонлади.
Наталья Гусева электрон саноат оператори ва терапевт оиласида туғилган. Оддий турмуш тарзида ҳамма қатори катта бўлган: боғчага борган, ўйинчоқлари билан ўйнаган ва дугоналари билан арғимчоқ учган, 7 ёшга тўлганида эса мактаб формасида биринчи синфга отланган.
Мактабда у ҳар доим аълочи бўлган, кўпроқ биологияга қизиққан ва илм-фанга ҳаётини бағишлашни орзу қилган — актриса бўлишни хаёлига ҳам келтирмаган. Ҳаммаси бутунлай тасодифан содир бўлади: Наталья 5-синфда ўқиётганида уларнинг мактабига М.Горкий номидаги киностудиядан ёрдамчи ходим келади. Унга янги лойиҳаларда қатнашиш учун яхши талаффузга эга, шеърларни ифодали ўқий оладиган болалар керак эди. Гусева осонгина кастингдан ўтади: тахмин қилинганидек, у кичик эпизодларда суратга тушиши керак эди, аммо қизга дарҳол асосий роль — “Келажакдан келган меҳмон” фильмидаги Алиса Селезнёва образини таклиф қилишади.
Гусевага кинода суратга тушиш жуда ёқиб қолади, бироқ фильм намойиш этилгач, унга ёпирилган шон-шуҳратга қизча тайёр эмасди. Кейинчалик у ҳаётига бунчалик кўп эътибор қаратилиши уни қўрқитганини тан олган — ахир у оддий мактаб ўқувчиси эди, лекин кўплар уни кинодаги қаҳрамони, космик қароқчилардан дунёни қутқарувчи Алиса Селезнёва сифатида кўрарди.
Наташа дарҳол қарор қилади: у бўш вақтларида суратга тушиши мумкин, аммо келажакда актриса бўлмайди. Гусева режиссёрлардан кўплаб таклифлар ола бошлайди, у ҳар бир сценарийни диққат билан ўқиб чиқар ва фақат обрўсига ҳеч қандай зарар етказмаслиги мумкин бўлган ролларга розилик берарди. “Келажакдан келган меҳмон”дан кейин у яна учта фильм — “Аср пойгаси”, “Бинафшаранг шар” ва “Тақдири азал”да суратга тушган, бироқ улар томошабинлар эътиборидан четда қолиб кетган.
Гусева 16 ёшга тўлганда уни “Авария — милиция ходимининг қизи” фильмидаги асосий ролга таклиф қилишади. Фильмда зўравонлик саҳналари кўп бўлгани учун Наталья рад этади. У кинодан кетганида ҳам Алиса Селезнёва бўлиб қолишни истаганди. Мухлислар “Келажакдан келган меҳмон”ни севиб томоша қилишар, фильмдаги ҳар бир жумлани ёдлаб олишарди. Бу вақтда эса Гусева Москва ташқарисида жойлашган Звенигород шаҳридаги ўз хонасида битирув имтиҳонларига тайёргарлик кўради.
Мактабни тамомлагач, Наташа Москва давлат кимё технологиялари институтининг биотехнология кафедрасига ўқишга киради. Университетни битиргач, ўз мутахассислиги бўйича илмий ходим сифатида дарҳол ишга олинади.
Институтнинг сўнгги курсида Гусева турмушга чиқади. Турмуш ўртоғи билан у мактаб пайтларида Минскдаги гастролларга борганида танишиб қолганди. Денис Мурашкевич уни биринчи марта телевизор орқали кўрганида унга ошиқ бўлган ва реал ҳаётдаги Алиса Селезнёва билан танишишни мақсад қилганди.
Танишувларининг ғаройиб тарихига қарамай, 7 йил ўтгач уларнинг никоҳлари ажрашиш билан якунланади. Шу вақт мобайнида Наталья ва Денис ажойиб қизалоқ — Алесиянинг ота-онаси бўлади. Алесия онасидан фарқли равишда кино саноатини танлайди, лекин актриса эмас, режиссёр бўлади.
Ажрашгандан кейин Наталья эрининг фамилиясида қолади: ўша пайтда у анчадан бери кинода суратга тушмаган бўлса-да, бироқ барибир ўзига ортиқча эътибор жалб қилишни истамаган.
Шундан сўнг Наталья Гусева қизини 12 йил ёлғиз ўзи тарбиялайди, бироқ бу вақтда карьераси устида тинимсиз ишлайди. Кичик илмий ходимдан компания раҳбарлигигача кўтарилади. Ҳатто қисқа муддатга кино оламига қайтиб, “Алисанинг туғилган куни” мультфильмининг бир қаҳрамонига овоз беради ва “Чугун” телесериалида эпизодик роль ўйнайди.
40 ёшга тўлганидан кейин у янгидан оилавий бахтини топади. Унинг иккинчи турмуш ўртоғи хайрия фонди бўлган “Русфонд” раҳбарининг ўғли дизайнер Сергей Амбиндер эди. Сергей “Русфонд”да отаси раҳбарлигида ишлар, саратон касаллиги билан оғриган болаларга ёрдам бериш билан шуғулланарди. Актриса узоқ вақт ўзининг янги муносабатини оммадан яширади, уч йил ўтгач, севимли кишиси билан яширин равишда никоҳдан ўтади.
Қизиғи шундаки, Гусеванинг шахсий ҳаётидаги барча сирларини унинг собиқ турмуш ўртоғи Денис Мурашкевич айтиб берган. У рафиқаси билан дўстона муносабатларини сақлаб қолганини, бахтини топганидан қувонганини тан олган. 2013 йилда Наталья ва унинг иккинчи турмуш ўртоғидан София исмли қизи дунёга келади.
Қизи дунёга келганидан кейин Гусева илмий карьерасидан танаффус олиб, ўзини кичкинтойни парвариш қилишга бағишлайди. У ишига қайтганми ёки йўқми номаълум, лекин туғуруқ таътилида ўтказган вақтини Гусева жуда ажойиб деб ҳисоблаган. У кўп вақтини кичик қизи ва турмуш ўртоғи билан ўтказади, сайр қилади, дўстлари билан учрашади. Бироқ аввалгидек жамоат тадбирларидан четда туради ва келажакда ҳам шундай ҳаёт тарзини, ортиқча миш-мишлар, драмалар ва ғийбатларсиз давом эттириш ниятида эканлигини таъкидлайди.
Изоҳ (0)