Британия ҳукумати Украинага Қироллик Қуролли Кучлари ихтиёридаги деярли барча АS-90 ўзиюрар артиллерия мосламаларини етказиб берди. Бу ҳақда Буюк Британия мудофаа вазири ўринбосари Жеймс Хиппи маълум қилди.
“Буюк Британия деярли барча АS-90 оғир артиллерия мосламаларини Украинага етказиб берди. Ўқ-дорилар борасида ҳам сахийлик қилдик, лекин юқори шайликдаги кучларимиз учун зарур бўлган захираларни сақлаб қолдик. Бундан ташқари, биз 155 мм снарядлар ишлаб чиқаришни тезлаштирдик ва бутун дунё бўйлаб имкон қадар кўпроқ 152 мм ва 122 мм снарядларни сотиб олишни бошладик.
Буюк Британиянинг Украина артиллериясига қўшган ҳиссаси бизнинг артиллерия захираларимиз билан чекланиб қолмайди, балки ундан ҳам кўпроқ қурол ва ўқ-дорилар етказиб беришга ҳаракат қиламиз”, — деди Хиппи Британия парламентининг Жамоатлар палатасида сўзлаган нутқида.
17 февраль куни Дания бош вазири Метте Фредериксен Мюнхен хавфсизлик конференциясида Дания қуролли кучлари аллақачон барча артиллерияларини Украинага ўтказиб бўлганини, энди Европа давлатлари омборларда сақланаётган ўқ-дориларни Киевга юбориши кераклигини айтганди.
Изоҳ (0)