Россия афғон фуқаролик фаоллари иштирокида бўлиб ўтадиган Қатардаги йиғилишга вакил юборишдан бош тортди. Бунга “Толибон” вакилларининг талаб ва илтимоси сабаб бўлган. Бу ҳақда Tasnim News нашри хабар берган.
БМТ бош котиби мезбонлик қилган Доҳа учрашувининг иккинчи кунидаги учрашувлар давом этаётган бир пайтда Россиянинг Кобулдаги элчихонаси Доҳада афғон фуқаролик фаоллари иштирокида бўлиб ўтадиган йиғинга вакил юбормаслигини маълум қилди. Элчихона билдиришича, вакил юбормасликни Россия ҳукуматидан “Толибон” сўраган.
“Толибон” ҳукуматининг талабларидан сўнг Россия томони афғон фаоллари иштирокида ташкил этилган йиғилишда қатнашмасликка қарор қилди”, — дейилади элчихона расмий баёнотида.
Шунингдек, Россия элчихонаси билдиришича, Афғонистондаги амалдаги бошқарувчи куч “Толибон” вакиллари БМТ бош котиби Антониу Гутерриш шафелигида бўлиб ўтадиган махсус элчилар йиғилиши доирасида режалаштирилган тадбирларнинг аҳамиятсиз қисмига таклиф қилинган.
Қатар анжуманида бир мамлакатни ифода этувчи 2 ва ундан ортиқ делегацияларнинг бўлиши эҳтимоли Афғонистон муваққат ҳукумати ташқи ишлар вазири Амир Хон Муттақий бошчилигидаги делегация томонидан йиғиндаги иштирок бекор қилинишига олиб келган эди. Россия элчихонаси Кобулнинг тутган позициясини “асосли” ва “оқилона” деб баҳолаган.
Доҳа учрашуви аввалида “Толибон” унда иштирок этиш учун иккита шартини маълум қилган. Унга кўра, “Толибон” учрашувда мамлакат номидан қатнашувчи ягона вакил бўлиши керак. Шу билан биргаликда, Гутерриш билан тўғридан-тўғри музокара олиб борилиши керак.
Бу талабларнинг бажарилмаслиги аввалига “Толибон”, кейинчалик эса Россиянинг ўйиндан чиқишига олиб келгани маълум қилинган.
Изоҳ (0)