Президент раислигида Андижон вилоятида бўлиб ўтаётган йиғилишда қурилиш, сув таъминоти, йўл, кўча ҳамда маҳаллаларни кўкаламзорлаштириш ва ободонлаштириш ишларини янги босқичга кўтариш, бу борада Андижон тажрибасини яратиш муҳимлиги таъкидланди.
Вилоятдаги маҳаллаларни мева-сабзавот, чорвачилик, ҳунармандчилик, касаначилик, саноат, савдо ва хизматга чуқур ихтисослаштириш бўйича дастур амалга оширилади. Бу мақсадларга 850 миллиард сўм кредит ресурслари ва 50 миллиард сўм субсидия ажратилади.
Давлат раҳбари қурилиш соҳасига тўхталиб ўтди. 2024 йилда Андижонда 190 та кўп қаватли уй-жой қуриб, 7 мингта оилани янги хонадон билан таъминлаш зарурлиги қайд этилди. Асака туманида “Янги Ўзбекистон” массивини ташкил этиб, 68 та уй қуриш, Шаҳрихон туманини ҳам “Янги Ўзбекистон” массивлари дастурига киритиш режалаштирилди.
Умуман, Андижон, Асака ва Шаҳрихон шаҳарларида урбанизация дастури амалга оширилиши, аҳолиси 100 мингдан ошадиган Асака ва Шаҳрихон шаҳарлари вилоят бўйсунувига ўтказилиши белгиланди. Ипотека дастури учун Андижонга қўшимча 100 миллион доллар ажратилади.
Изоҳ (0)