Президент томонидан имзоланган қонун билан айрим қонун ҳужжатларига ўзгартириш ва қўшимчалар киритилди, деб хабар беради Telegram’даги “Ҳуқуқий ахборот” канали.
Унга кўра, фуқаролар ва юридик шахсларнинг мурожаатларини давлат органлари ҳамда бошқа ташкилотлар томонидан кўриб чиққанлик ёки давлат рўйхатидан ўтказганлик учун давлат божи, йиғимлар ёки бошқа тўловлар тўлангани ҳақидаги тўлов ҳужжатларининг кўчирма нусхаларини тақдим этиш тўғрисидаги талаб бекор қилинди.
Шунингдек, “Оммавий ахборот воситалари тўғрисида”ги қонунга киритилган ўзгартиришга кўра, ОАВни рўйхатдан ўтказиш ҳақидаги аризани рўйхатдан ўтказувчи орган томонидан кўриб чиқиш муддати 15 кундан 10 кунга камайтирилди.
“Адвокатура тўғрисида”ги қонунга киритилган ўзгартиришга кўра, адвокатга гувоҳнома бериш муддати 2 иш куни этиб белгиланди (илгари 3 иш куни эди).
Қонун расмий эълон қилинган кундан эътиборан кучга киради.
Бундан олдин Ўзбекистонда мол-мулк билан боғлиқ айрим битимларни видеоконференсалоқа орқали расмийлаштиришга рухсат берилиши, нотариуслар томонидан ундириладиган тўловларнинг миқдори ўзгартирилиши маълум бўлганди.
Изоҳ (0)