“Йилига 10 минг нафар фермер ўқитилади”. Ўзбекистонда “Сувчилар мактаби”нинг иккинчи босқичи старт олди

Тошкент шаҳрида “Сувчилар мактаби” ўқув курсларининг иккинчи босқичи очилишига бағишланган маросим бўлиб ўтди. Унда вазирлик ва идоралар, банк, таълим соҳаси вакиллари, журналист ва блогерлар иштирок этди.

Тадбирда Ўзбекистон қишлоқ хўжалигида катта ҳажмдаги сув исроф бўлаётгани, муаммони ҳал қилиш учун соҳада сув тежовчи ускуналардан кенг фойладаниш зарурлиги айтилди. Масаланинг яна бир жиҳати эса кадрлар таёрлаш билан боғлиқ.

2023 йил 29 май куни президент Шавкат Мирзиёев ташаббуси билан Сув хўжалиги вазирлиги, ТIQХММИ миллий тадқиқот университети ҳамда Агробанк АТБ ҳамкорлигида “Сувчилар мактаби” ташкил этилганди. Мазкур лойиҳа фермерларга сув тежовчи технологиялардан самарали фойдаланишни ўргатишда катта самар бераётгани таъкидланди.

Маросимда Сув хўжалиги вазири Шавкат Ҳамраев сувни тежаш бугунги энг устувор йўналишлардан бири эканини айтди.

“Жами 4,3 миллион гектар суғориладиган ерларимизнинг 1,2 миллион гектарида сув тежовчи технологияларни самарали қўллаб келяпмиз. Бу йил яна 300 минг гектар ерга шундай ускуналар ўрнатилади ва умумий кўрсаткич 1,5 миллион гектарга етади. 2030 йилгача суғориладиган ерларимизни 100 фоиз сув тежовчи технологияларга ўтказамиз”, — деди вазир.

Тадбирда Агробанк АТБ бошқарув раиси Рустам Маматқулов ҳам нутқ сўзлаб, жорий йилда сув тежовчи лойиҳаларни молиялаштиришга катта маблағ ажратилаётганини маълум қилди. 

“Банкимиз томонидан қишлоқ хўжалигида сув тежовчи технологиялар сотиб олиш учун 14 фоизли имтиёзли кредитлар ажратилмоқда. Бу йил мазкур йўналишга 4,3 триллион сўм маблағ йўналтирилади”, — деди банк раҳбари.

“Сувчилар мактаби” ижтимоий лойиҳа бўлиб, унда ўқиш бепул. Лойиҳанинг биринчи босқичида (2023 йилнинг май–октябрь ойларида) 155 та туманда 61 мингдан ортиқ фермер хўжаликларининг раҳбар ва ходимлари ўқитилган.

Дастлабки босқичда сувдан фойдаланиш маданияти ва сув тежовчи технологияларни қўллаш назарий жиҳатдан кўпроқ ўргатилган бўлса, иккинчи босқичда асосий урғу амалий машғулотларга берилади.

“Агробанк раҳбари бу йил фермерлар сув тежовчи технологиялар сотиб олишлари учун катта миқдорда кредит маблағлари ажратилишини айтдилар. Албатта, бу маблағларнинг самараси бўлиши учун фермерларни ўқитиш керак. Эртага шунча маблағни фермерга берадиган бўлсак, у харид қилган ускуналаридан фойдаланишни билмаса, давлатнинг пули ҳавога учади. Қолаверса, фермер банкрот бўлади. Шунинг учун илмга тикилган пулнинг қиймати бўлмайди. “Сувчилар мактаби” ташкил этилишидан мақсад ҳам шу, аввало билим бериш”, — деди Сув хўжалиги вазири ўринбосари Рустам Қаршиев.

Лойиҳанинг иккинчи босқичи учун Агробанк томонидан республиканинг 13 та ҳудудида замонавий ўқув хоналари ҳамда илғор сув тежовчи технологиялар билан жиҳозланган тажриба майдонлари ташкил этилган. Мазкур босқич 2030 йилгача давом этиши, ушбу даврда фермер хўжаликларининг 60 минг нафар вакиллари чуқурлаштирилган ҳолда ўқитилади.

Ўқув дастурлари ишлаб чиқиш ва дарс бериш жараёнларига 150 нафар профессор ўқитувчилар (шундан 30 нафар Туркия, Испания, Хитойдан келган экспертлар) танлов асосида жалб қилинган. Ўқув курслари билан боғлиқ харажатлар Агробанк томонидан молиялаштирилади. Дарслар 5 кун (3 кун назарий, 2 кун амалий) давом этади.

Реклама ҳуқуқи асосида.