Toshkent shahrida “Suvchilar maktabi” o‘quv kurslarining ikkinchi bosqichi ochilishiga bag‘ishlangan marosim bo‘lib o‘tdi. Unda vazirlik va idoralar, bank, taʼlim sohasi vakillari, jurnalist va blogerlar ishtirok etdi.
-yxImVhps.jpg)
Tadbirda O‘zbekiston qishloq xo‘jaligida katta hajmdagi suv isrof bo‘layotgani, muammoni hal qilish uchun sohada suv tejovchi uskunalardan keng foyladanish zarurligi aytildi. Masalaning yana bir jihati esa kadrlar tayorlash bilan bog‘liq.
2023-yil 29-may kuni prezident Shavkat Mirziyoyev tashabbusi bilan Suv xo‘jaligi vazirligi, TIQXMMI milliy tadqiqot universiteti hamda Agrobank ATB hamkorligida “Suvchilar maktabi” tashkil etilgandi. Mazkur loyiha fermerlarga suv tejovchi texnologiyalardan samarali foydalanishni o‘rgatishda katta samar berayotgani ta’kidlandi.
Marosimda Suv xo‘jaligi vaziri Shavkat Hamrayev suvni tejash bugungi eng ustuvor yo‘nalishlardan biri ekanini aytdi.
“Jami 4,3 million gektar sug‘oriladigan yerlarimizning 1,2 million gektarida suv tejovchi texnologiyalarni samarali qo‘llab kelyapmiz. Bu yil yana 300 ming gektar yerga shunday uskunalar o‘rnatiladi va umumiy ko‘rsatkich 1,5 million gektarga yetadi. 2030-yilgacha sug‘oriladigan yerlarimizni 100 foiz suv tejovchi texnologiyalarga o‘tkazamiz”, — dedi vazir.
Tadbirda Agrobank ATB boshqaruv raisi Rustam Mamatqulov ham nutq so‘zlab, joriy yilda suv tejovchi loyihalarni moliyalashtirishga katta mablag‘ ajratilayotganini ma’lum qildi.
“Bankimiz tomonidan qishloq xo‘jaligida suv tejovchi texnologiyalar sotib olish uchun 14 foizli imtiyozli kreditlar ajratilmoqda. Bu yil mazkur yo‘nalishga 4,3 trillion so‘m mablag‘ yo‘naltiriladi”, — dedi bank rahbari.
“Suvchilar maktabi” ijtimoiy loyiha bo‘lib, unda o‘qish bepul. Loyihaning birinchi bosqichida (2023-yilning may–oktabr oylarida) 155 ta tumanda 61 mingdan ortiq fermer xo‘jaliklarining rahbar va xodimlari o‘qitilgan.
Dastlabki bosqichda suvdan foydalanish madaniyati va suv tejovchi texnologiyalarni qo‘llash nazariy jihatdan ko‘proq o‘rgatilgan bo‘lsa, ikkinchi bosqichda asosiy urg‘u amaliy mashg‘ulotlarga beriladi.
“Agrobank rahbari bu yil fermerlar suv tejovchi texnologiyalar sotib olishlari uchun katta miqdorda kredit mablag‘lari ajratilishini aytdilar. Albatta, bu mablag‘larning samarasi bo‘lishi uchun fermerlarni o‘qitish kerak. Ertaga shuncha mablag‘ni fermerga beradigan bo‘lsak, u xarid qilgan uskunalaridan foydalanishni bilmasa, davlatning puli havoga uchadi. Qolaversa, fermer bankrot bo‘ladi. Shuning uchun ilmga tikilgan pulning qiymati bo‘lmaydi. “Suvchilar maktabi” tashkil etilishidan maqsad ham shu, avvalo bilim berish”, — dedi Suv xo‘jaligi vaziri o‘rinbosari Rustam Qarshiyev.
Loyihaning ikkinchi bosqichi uchun Agrobank tomonidan respublikaning 13 ta hududida zamonaviy o‘quv xonalari hamda ilg‘or suv tejovchi texnologiyalar bilan jihozlangan tajriba maydonlari tashkil etilgan. Mazkur bosqich 2030-yilgacha davom etishi, ushbu davrda fermer xo‘jaliklarining 60 ming nafar vakillari chuqurlashtirilgan holda o‘qitiladi.
O‘quv dasturlari ishlab chiqish va dars berish jarayonlariga 150 nafar professor o‘qituvchilar (shundan 30 nafar Turkiya, Ispaniya, Xitoydan kelgan ekspertlar) tanlov asosida jalb qilingan. O‘quv kurslari bilan bog‘liq xarajatlar Agrobank tomonidan moliyalashtiriladi. Darslar 5 kun (3 kun nazariy, 2 kun amaliy) davom etadi.
Reklama huquqi asosida.
Izoh (0)