Ўзбекистондаги шифохоналарда фаолият юритувчи шифокорларнинг беморларга дори ёзишида дорихоналар ҳамда фармчилар билан келишиб, улар айтган дорини тавсия қилиш амалиётига қачон ва қай йўл билан чек қўйилиши сўралди. Бу ҳақдаги савол Фармацевтика тармоғини ривожлантириш агентлиги ҳузуридаги Жамоатчилик кенгаши йиғилишида Demokrat.uz сайти ходими, журналист Илёс Сафаров томонидан янгради.
Журналист йиғилишда соҳада қилиниши лозим бўлган ишлар ва режалар ҳақида гапирган амалдор — Фармацевтика тармоғини ривожлантириш агентлиги директори Абдулла Азизовга юзланиб, агентликнинг бу масаладаги фикрини сўради.
Давлат шифохоналарида ҳам, хусусийларида ҳам врачларнинг дорихоналар ва фармкомпаниялар билан келишиб олиб, улар тавсия қилаётган дориларни фойдаси бўлса, бўлмаса “олти-еттита дори бўлса, орасида битта фойдасизи бўлса бўлар”, деган қараш билан ёзиш амалиёти бор. Мана шу ҳолатнинг илдизига қандай болта уриш мумкин, бу ҳақда ҳам ўйланяптими?, — дея савол берди журналист.
Фармацевтика тармоғини ривожлантириш агентлиги директори Абдулла Азизов бунинг ечими электрон рецепт эканини айтди.
Бунинг олдини олиш йўли айтганимдек, электрон рецепт. Ким билан гаплашманг, сен электрон рецептни тушунмагунингча бир жойда сакраб тураверасан дейишади. Бизда рецепт формаси бор. Лекин одамлар рецепт ёзишни ҳам билмайди. Уни тўлдиришни ҳам билмайди. Чунки у ерда бир дона дори ёза оласиз. 15 та дори ёзиш, қоғоз тўлдириш учун бир соат ўтиради. Шунинг учун энг осони бир қоғозни олиб, ёзиб, буни бериш. Оддий қоғозга ёзилган рецептни ким ёзганини билиб бўлмайди ва ёзган одам ҳам тан олмайди. Бўлди, аптекага борди, аптекачи қандай ўқиса, шундай бериб юбораверади. Данияда оилавий шифокор сифатида ишловчи акамдан энг кўп ёзган дорингиз сони нечта деб сўрганимда, энг кўпи учта эканини айтганди.
Бизда эса 10-15 та. Электрон рецепт ёзаётган шифокор ўзининг логин, пароли билан киради. У нима берганини биз историяси орқали ҳар доим кўрамиз. Қайсидир врач ҳар доим битта препаратни ёзяптими демак, у кимгадир ишлайди. Ёки дорини тўрттадан кўп ёзди. Шу ерда бош врач уни чақириб, анализ қилиши керак. ‘Нега тўртта ёки ундан кўп дори ёздинг, менга тушунтир’ деб сўраши керак. Бизда ҳозир 10 та ёзса ҳам, биров уни назорат қилмайди. Бизда шифокорлар ҳам ўша ёзган ўнта дорисининг иккитаси фойда беришини билади. Бемор эса 10 та дори ичиб, ҳаммасининг таъсири бўляпти деб хурсанд бўлиб юради. Биз электрон рецепт орқали ишлашимиз керак. Бунинг битта ечими шу, — деди Фармацевтика тармоғини ривожлантириш агентлиги директори Абдулла Азизов.
Изоҳ (0)