Журналист Азиза Қурбонова Фармацевтика тармоғини ривожлантириш агентлиги директори ҳамда масъулларига Ўзбекистоннинг фармацевтика тармоғидаги муаммолар ҳақида давлат раҳбарига айтиб, таклиф беришлари кераклигини билдирди. Ва халқнинг фармацевтларга, ўзининг фарм бозорига ишончи йўқолганини айтди. Бу ҳақда агентлик ҳузуридаги Жамоатчилик кенгаши йиғилишида сўз борди.
2024 йилнинг 2 февраль куни бўлиб ўтган йиғилишда сўз олган масъул — Фармацевтика тармоғини ривожлантириш агентлиги директори Абдулла Азизов соҳада қилиниши лозим бўлган ишлар ва режалар ҳақида гапиргач, журналист ва блогерларни қизиқтирган саволларга ҳам жавоб қайтарди.
Тадбирда сўз олган журналист Азиза Қурбонова агентлик раҳбари Абдулла Азизовга юзланар экан, “Халққа сифатли дори керак. Масалан, менда ҳозир дилемма турибди. Фарзандим бир ёш-у бир ойлик, давлат эмлашини олиш учун АКДСга борсаммикин ёки хусусийга 1 миллион сўмга қилдирсаммикин? Давлатникига ишонч йўқ дейишмоқда. Лекин у катта маблағ эвазига Ҳиндистондан келади. Уларда ҳам кимнингдир боши турибди, жавоб бериши керак. Сифатини текширгандир. Аммо менга ‘сенга қийин бўлади, боланг қийналади’ деган гапни шифокорлар айтмоқда. Мен бир миллион топа оламан, лекин мамлакатнинг 35 миллион аҳолисидан 5 миллиони шу пулни топа олмайди. Статистикани кўринг, минглаб, юз минглаб аёллар рад этяпти буни. ‘Мен бу эмлашни олишни истамайман’, демоқда. Ишонч йўқолди. Халқнинг фармацевтларга, ўзининг фарм бозорига ишончи йўқ эди, лекин бори ҳам йўқолди”, — деди журналист.
Журналист давлатнинг ёд билан боғлиқ катта лойиҳаси ҳам ўзини оқламаганини эслатди ва бу воқеа айбдорлари билан боғлиқ ҳолат ҳамон очиқланмаганини билдирди.
Халқнинг хотираси қисқа дейсиз-у, лекин унутмаяпти. Энди фарзандларимизни, бўйи етмаган қизларимизни папиллома вирусига қарши эмлашимиз керак. Ҳолбуки, 125 минг одам рак бизда. Аёллар женский томонлама рак. Муаммолар босиб ётибди. Ёшларимизни эмлашимиз керак дея эзгу ниятда олиб келинган папиллома вакцинасига халқ умуман ишонмайди. Мен докторлар авлоди бўлган дугоналаримни ишонтиролмаяпман. Улар қизларига шу вакцинани қилдирмайди. Лекин қизлар турмушга чиққунларича, шу вакцинани олиши керак. Бу ишончни қайтариш осон бўлмайди. Шу сабаб ҳам қилолмаган ишларимизни пулга бўлса ҳам қилдиришимиз керак. Сиз давлат раҳбарининг олдига киргач, муаммоларни кўтара оласиз. Буни биламан. Сиз ҳаммага ўхшаб ‘бизда ҳаммаси зўр’ демайсиз. Бунинг учун раҳмат айтаман, албатта. Кўп кўрганман ўзим. Ҳар ҳолда масала қўя оладиган раҳбар ниманидир ўзгартириши мумкин, — дейди Азиза Қурбонова.
Журналист масъулларга таклиф берар экан, дори лабораторияларни ауцорс қилиш кераклигини, қўлимиздан келмаган ишни кимгадир пул бериб бўлса-да, қилдириш лозимлигини айтмоқда.
Ҳамма шу ишни қилади. Эртага миллиард-миллиард компенсация тўлагандан кўра, ҳозир пулларни кетказган яхши. Фарм институтга кўпчилик пулга кирган. Қанақа қилиб текшириб беради? Яхшиям сизлар қолгансизлар, кейинги авлоддан қўрқаман, — деди журналист.
Саволга жавоб берган масъул, Давлат фармакопеяси бош муҳаррири Ҳабибулла Жалилов журналистнинг бу саволига жавобан дастлаб уни соҳани яхши тушунмасликда, соҳанинг айни кундаги ўзгаришларидан бехабарликда айблади.
Балким бу куйинишга “Док-1 Макс” сабаб бўлаётгандир. Аслида “Док-1 Макс” фожиасининг келиб чиқиш сабабини билиб олайлик. Бу ердагиларнинг кўпчилиги бундан хабардор. “Док-1 Макс” аслида қалбаки дори. Ҳиндистонлик ишлаб чиқарувчи кўра-била туриб, атайлаб, бу ерда яхши экспертизадан ўтиб, яхши синовдан ўтган дори ўрнига катта фойда олиш учун нотўғри хом ашёни қўшиб, заҳарли дори ишлаб чиқарган. Ҳеч қайси давлатда қалбаки дорининг ичидаги примисдан сақланадиган 100 фоизлик кафолатли текширув йўқ. АҚШ ва Европа мамлакатларида ҳам бундай заҳарланиш ҳолати кузатилган ва уларда ҳам бундай аниқлаш имконияти йўқ, — деди Давлат фармакопеяси бош муҳаррири Ҳабибулла Жалилов.
Давлат фармакопеяси бош муҳаррири аввалроқ Ўзбекистонда “Док-1 Макс” фожиаси такрорланмаслигини, мамлакатда эндиликда заҳарли дориларни аниқловчи имконият борлигини маълум қилганди.
Изоҳ (0)