Адлия вазирлиги “Ўзбекистонда байрамларнинг мафкуравий мазмунини кучайтириш ва оммалаштириш концепциясини тасдиқлаш тўғрисида”ги ҳукумат қарори лойиҳасини муҳокамага қўйди.
Концепцияда қайд этилишича, барча даражадаги таълим муассасаларининг ўқув дастурларига миллий тарих ва қадриятларни англаш, ватанга дахлдорлик ҳиссини кучайтириш мақсадида умумхалқ байрамлари, муҳим саналар, касб байрамлари ва халқаро кунларга оид мафкуравий мавзулар киритилади. Таълим олувчилар ва бошқа аҳоли қатлами учун байрамлар ҳақида турли қизиқарли маълумот берувчи интерфаол ўқув ресурслари, жумладан, мултимедиа тақдимотлари, ҳужжатли фильмлар ва мафкуравий мавзулар билан боғлиқ виртуал кўргазмаларни ўз ичига олган рақамли платформа ишлаб чиқилади.
Шунингдек, аҳолининг турли қатламлари ўртасида байрамларнинг мафкуравий мазмунини кучайтириш мақсадида маданий ва миллий анъаналарни ифодалаш, байрамона ва қувноқ муҳит яратиш, шу билан бирга ҳудудларга ташриф буюрувчиларни жалб қилиш орқали маҳаллий туризмга ҳисса қўшишни назарда тутувчи байрамлар учун рамзий кўчалар ташкил қилинади.
Байрамларнинг маданий, тарихий ва ғоявий жиҳатларини акс эттирувчи ижодий ишларни қўллаб-қувватлаш ҳамда мафкуравий мазмунни етказишнинг янги усул ва услубларини кашф этишга, ранг-баранг маданий хилма-хилликка бўлган қизиқишларни кучайтириш ва рағбатлантириш мақсадида байрамларнинг мафкуравий мазмунини кучайтиришга қаратилган “Энг яхши ҳикоя”, “Энг яхши эртак”, “Энг яхши шеър”, “Энг яхши блогпост”, “Энг яхши мақола” номинациялари бўйича танловлар ташкил этилади.
Концепцияда байрамларнинг мафкуравий мазмунини кучайтириш мақсадида ёшлар ва аҳоли ўртасида турли тадбир ва танловлар, спорт мусобақалари, ижодий беллашувлар, олимпиадалар ўтказиш, аҳолига хизмат кўрсатувчи давлат органларида байрам бурчаклари ташкил, республика ҳудудида фойдаланиладиган мобил телефонлар, планшет ва бошқа алоқа қурилмаларидаги календарларда байрам саналарига оид маълумот автоматик ўрнатилиши имкониятини яратиш ҳам назарда тутилмоқда. Қарор муҳокамаси 16 февралга қадар давом этади.
Изоҳ (0)