Намангандаги аёллар форумида муваффақиятга эришган 5 нафар опа-сингил спикерлик қилди (фото)

Намангандаги Давлатобод маданият саройида “Муваффақият сари бирлашамиз!” номли аёллар форуми бўлиб ўтди. Бу ҳақда “Дарё” мухбири Азизбек Абдувалиев хабар бермоқда.

Вилоят ҳокимлиги ва Ёшлар ишлари агентлиги билан ҳамкорликда ташкил этилган форум доирасида тадбиркор ва ҳунарманд аёллар кўргазмаси ҳам бўлиб ўтди. Эҳтиёжманд ва ногиронлиги бўлган оилалар вакилларига тикув машиналари, ногиронлик аравачалари топширилди.

500 нафардан зиёд хотин-қиз иштирок этган тадбирда бир оиланинг 5 нафар вакили — опа-сингиллар спикер сифатида иштирок этиб, муваффақият сирлари ва тадбиркорлик кўникмалари билан ўртоқлашди.

BA Holding бош директори Гулбаҳор Тожимирзаева, ушбу ҳолдинг молия директори Гулинур Абдуллаева, Бизнес-омбудсман матбуот котиби Гулжамол Шукурова, Wаng Dа Group қўшма корхонаси бош директори Гўзал Тожимирзаева, Пекиндаги Sinxua университети талабаси, Зулфия номли давлат мукофоти совриндори, хонанда Ширин Абдуллаева ўзлари эришган ютуқлар, бунда оила ва ота-онанинг ўрни, давлат хизмати ва тадбиркорлик тузилмаларида хотин-қизлар мавқейи ҳақида чиқишлар қилди.

Форумни ташкил этишдан кўзда тутилган асосий мақсад чекка ҳудудлардаги аёлларимиз билан яқиндан мулоқот қилиш, тажрибаларимиз билан ўртоқлашиш, саволлари ва таклифларини тинглашдан иборат. Аслида бу тадбир қизлар марафони сифатида ўтиши кўзда тутилган. 15 йил давомида Хитойда яшаб-ўқиб, ўз бизнесимни йўлга қўйганман ва ҳозирги кунда муваффақиятли давом эттириб келяпман. Мазкур ғоя ўша пайтларда пайдо бўлган. Таклифимни Ёшлар ишлари агентлиги раҳбари Алишер Саъдуллаевга билдирдим ва у киши бизни қўллаб-қувватлади. Тадбирни ўзимиз туғилиб-ўсган Намангандан бошладик, кейинчалик бошқа вилоятларда ҳам давом эттириш ниятимиз бор, — дейди Гулбаҳор Тожимирзаева.

Форумда фаол иштирок этган аёлларга эсдалик совғалари топширилди. Модалар кўргазмаси, хонандалар Зиёда ва Малика Эгамбердиеванинг чиқишлар эса даврага кўтаринки кайфият бағишлади.