Namangandagi ayollar forumida muvaffaqiyatga erishgan 5 nafar opa-singil spikerlik qildi (foto)

Namangandagi Davlatobod madaniyat saroyida “Muvaffaqiyat sari birlashamiz!” nomli ayollar forumi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.

Viloyat hokimligi va Yoshlar ishlari agentligi bilan hamkorlikda tashkil etilgan forum doirasida tadbirkor va hunarmand ayollar ko‘rgazmasi ham bo‘lib o‘tdi. Ehtiyojmand va nogironligi bo‘lgan oilalar vakillariga tikuv mashinalari, nogironlik aravachalari topshirildi.

500 nafardan ziyod xotin-qiz ishtirok etgan tadbirda bir oilaning 5 nafar vakili — opa-singillar spiker sifatida ishtirok etib, muvaffaqiyat sirlari va tadbirkorlik ko‘nikmalari bilan o‘rtoqlashdi.

BA Holding bosh direktori Gulbahor Tojimirzayeva, ushbu holding moliya direktori Gulinur Abdullayeva, Biznes-ombudsman matbuot kotibi Guljamol Shukurova, Wang Da Group qo‘shma korxonasi bosh direktori Go‘zal Tojimirzayeva, Pekindagi Sinxua universiteti talabasi, Zulfiya nomli davlat mukofoti sovrindori, xonanda Shirin Abdullayeva o‘zlari erishgan yutuqlar, bunda oila va ota-onaning o‘rni, davlat xizmati va tadbirkorlik tuzilmalarida xotin-qizlar mavqeyi haqida chiqishlar qildi.

Forumni tashkil etishdan ko‘zda tutilgan asosiy maqsad chekka hududlardagi ayollarimiz bilan yaqindan muloqot qilish, tajribalarimiz bilan o‘rtoqlashish, savollari va takliflarini tinglashdan iborat. Aslida bu tadbir qizlar marafoni sifatida o‘tishi ko‘zda tutilgan. 15 yil davomida Xitoyda yashab-o‘qib, o‘z biznesimni yo‘lga qo‘yganman va hozirgi kunda muvaffaqiyatli davom ettirib kelyapman. Mazkur g‘oya o‘sha paytlarda paydo bo‘lgan. Taklifimni Yoshlar ishlari agentligi rahbari Alisher Saʼdullayevga bildirdim va u kishi bizni qo‘llab-quvvatladi. Tadbirni o‘zimiz tug‘ilib-o‘sgan Namangandan boshladik, keyinchalik boshqa viloyatlarda ham davom ettirish niyatimiz bor, — deydi Gulbahor Tojimirzayeva.

Forumda faol ishtirok etgan ayollarga esdalik sovg‘alari topshirildi. Modalar ko‘rgazmasi, xonandalar Ziyoda va Malika Egamberdiyevaning chiqishlar esa davraga ko‘tarinki kayfiyat bag‘ishladi.