Жанубий Кореянинг Hancom Group компанияси Ўзбекистонда IT-таълим экотизимини ривожлантиради. Бу ҳақда Рақамли технологиялар вазири ўринбосари Рустам Каримжонов маълум қилди.
Ўзбекистонда Жанубий Кореянинг илғор рақамли таълимини жорий қилиш мақсадида Рақамли технологиялар вазирлигида Hancom Academy вакиллари иштирокида англашилув меморандуми имзоланди. Келишувга асосан, компания таркибига кирувчи Hancom Academy Ўзбекистон бўйлаб IT соҳасига қизиқиши юқори бўлган иқтидорли ёшларни саралаб уларни Data science, Artificial and Cloud technologies, Software engineering каби келажак касбларига ўқитиш дастурини йўлга қўяди.
Шунингдек, Hancom Academy томонидан ишлаб чиқилган алоҳида ўқув дастури бўйича маҳаллий IT менторларни тайёрлаш тизими йўлга қўйилади.
Ўқув дастури ёшларга Ўзбекистон ва жаҳонда талаб катта бўлган ҳамда юқори маош тўланадиган касбларни ўргатишга мўлжалланган. Дастур битирувчилари келажакда юқори даромадли касб эгаси бўлиш ҳамда чет элга IT хизматлар экспорти билан шуғулланиш имкониятига эга бўлади.
Маълумот учун, Hancom Group 1990 йил ташкил этилган бўлиб, Жанубий Кореяда Microsoft Office ўрнини боса оладиган Hangul Korean Word дастурий таъминотини яратиш билан Кореяда танилган компаниядир. Hancom Group’нинг сунъий интеллект, дрон ва бошқа илғор технологияларни ўқитишга ихтисослашган онлайн таълим платформасига эга йирик IT академия — Hancom Academy шўба ташкилоти мавжуд.
Ушбу IT академия Корея Республикасида йирик корхоналар, жумладан Samsung Electronics, SК Telecom, КТ, LG Electronics ходимлари ва давлат хизматчилари малакасини ошириш билан шуғулланади, ҳамда йирик университетлар билан ҳамкорлик қилади.
Изоҳ (0)