“Боламни гапириб, ўйнаб юрган ҳолатига қайтариб беринг. Мен сизга 3 млрд сўм бераман” — “Док-1 Макс”дан фарзанди ногирон бўлиб қолган ота

“Док-1 Макс” сиропи сабаб гапиришдан, юришдан тўхтаган ва биринчи гуруҳ ногиронига айланган 5 ёшли Алибек Ўктамовнинг отаси Феруз Нуритдинов судда фарзандини даволатиш учун айни кунга қадар 35 минг доллар харажат қилганини, боласи соғайиб кетиши учун яна 3 миллиард сўм компенсация сўрашини маълум қилди. Адвокат Ражабов эса “Фарзандингизнинг бундай ҳолга тушишига бу ердагиларнинг (судланувчиларнинг — таҳ.изоҳи) қандай айби бор, нега улардан бу пулни талаб қиляпсиз?”, дея савол берди. Жабрланувчи эса бунга жавобан “Боламни гапириб, ўйнаб юрган ҳолатига қайтариб беринг, мен сизга 3 миллиард сўм бераман”, деди. Бу ҳақда судда қатнашган “Дарё” мухбири хабар берди. 

Феруз Нуритдиновга кўра, унинг боласи 2022 йилнинг декабрь ойида сиропдан заҳарланган ва 65 кун комада ётган.

2022 йилнинг декабрь ойи бошларида болам шамоллаб қолгани учун “Док-1 Макс” сиропини ичира бошладик. Ўғлим сироп ичишни бошлашидан уч кун ўтиб, қайт қилди. Нукус шаҳридаги шифохонада боламнинг икки буйраги ишламаётганини айтиб, Тошкентга олиб бориш кераклигини уқтиришди, — деганди аввалроқ “Дарё” журналистига бу ҳақида гапириб берган ота.

Жабрланувчининг айтишича, у фарзандини даволатиш учун айни кунга қадар сотилган уйи ва яқинларидан олинган қарзлари эвазига тўпланган 35 минг доллар маблағини сарфлаб бўлган. Шунга қарамасдан унинг фарзанди гапиролмайдиган, юролмайдиган ногиронга айланган.

Жабрланувчининг сўзини тинглаган давлат айбловчиси Саидакром Оқилов судланувчиларга нисбатан қандай даъвоси борлигини сўради.

Жазони мен эмас, Аллоҳ беради. Уларнинг ҳам фарзанди бор. Виждонига ҳавола қиламан. Иккинчидан, ҳурматли судьянинг виждонига қолдираман. Шунча бола вафот этди, қанча-қанчаси ногирон бўлиб қолди, — дейди у.

Судья Мусо Юсупов моддий ва маънавий зарар учун қанча талаб қилишини сўради. Жабрланувчи 3 миллиард сўм сўрашини айтди. 

Жабрланувчига савол берган адвокат Ражабов эса “Фарзандингизнинг шундай ҳолга тушишига бу ердагиларнинг (судланувчиларнинг — таҳ.изоҳи) қандай айби бор? Нега улардан бу пулни талаб қиляпсиз?”, дея савол берди. 

Менга 3 миллиард сўмнинг бир сўми ҳам қизиқ эмас. Фақат боламни бу аҳволда ташлаб қўймай, даволатишим керак. Боламни гапириб, ўйнаб юрган ҳолатига қайтариб беринг, мен сизга 3 миллиард сўм бераман, — деди жабрланувчи ота.