АҚШ президенти Жо Байден келаси ҳафтада Украинага ёрдам бериш йўлидаги асосий тўсиқлардан бири бўлиб турган АҚШ-Мексика чегараси бўйича Сенат келишувига эришишга умид қилаётганини айтди.
Reuters агентлигига кўра, АҚШ президенти ‘‘катта ўзгаришларга’’ тайёрлигини маълум қилган.
‘‘Ўйлайманки, биз келгуси ҳафта, ҳеч бўлмаганда Сенатда бирор натижага эриша оламиз ва умид қиламанки, бу икки партиявий пакет бўлади’’, — деди Байден. ‘‘Энди Вакиллар палатасидаги спикер ва республикачилар учун савол, улар худди шундай ҳаракат қилишга тайёрми?’’
Газетанинг ёзишича, Вакиллар палатасидаги айрим республикачилар спикер Майк Жонсон чегара хавфсизлиги тўғрисидаги келишувни Украинага ёрдам кўрсатишни ҳам ўз ичига олувчи пакетнинг бир қисми сифатида кўриб чиқса, уни лавозимидан четлатишга ҳаракат қилиш билан таҳдид қилмоқда.
Шу билан бирга, Байден иммиграция сиёсатида ўзгаришлар зарурлигини тан олди.
‘‘Мен бу муаммони ҳал қилишга тайёрман, мен ҳақиқатан ҳам катта ўзгаришларга тайёрман ва буни чин дилдан айтяпман’’, — деди у. ‘‘Менимча, биз чегарадаги сиёсатда жиддий ўзгаришларга муҳтожмиз, шу жумладан бошпана тизимидаги ўзгаришларни ҳам қайта кўриб чиқиш зарур’’.
Оқ уй матбуот котиби Карин Жан-Пьер аввалроқ журналистларга республикачи ва демократ сенаторлар билан музокаралар самарали бўлганини айтган, бироқ тафсилотларни маълум қилишдан бош тортган.
Изоҳ (0)