Тошкент вилояти Қуйи Чирчиқ туманида 16 ёшли бола танаси қозон портлаши оқибатида 90 фоиз куйиб кетди. Бу ҳақда Болалар омбудсмани хабар берди.
Қуйи Чирчиқ туманида истиқомат қилувчи, 2008 йилда туғилган Ж.Ж. ўз яшаш хонадонида иситувчи қозон портлаши оқибати 90 фоиз оғир тана куйиш жароҳати олганлиги туфайли мунтазам тиббий хизматга ва даволаниш учун моддий ёрдам кўрсатилишига муҳтожлиги тўғрисида Болалар омбудсмани котибиятига мурожаат келиб тушган.
Аниқланишича, 2008 йилда тугилган Ж.Ж. 2023 йил октябрь ойида бундай жиддий куйиш жароҳатини олганидан сўнг Республика шошилинч тиббий ёрдам марказига олиб келиниб, у ерда барча тез тиббий ёрдам чоралари кўрилган ва 2 ой давомида шифокорлар томонидан даволаниб, зарур тиббий муолажалар кўрсатилган. Сўнг жароҳатлар даражаси мураккаблигига ва доимий тиббий кузатув талаб этилишига қарамай Ж.Ж. ота-онаси томонидан уй шароитида парвариш қилиш учун олиб кетилган.
Ҳозирда Ж.Ж. га зарур тиббий муолажалар кўрсатилди ва доимий шифокор кузатуви бириктирилди. Шунингдек, вилоят Соғлиқни сақлаш бошқармаси томонидан бемор мунтазам даволаниш учун керак бўлган дори-дармонлар билан таъминланмоқда ҳамда унга ногиронлик нафақасини белгилаш учун керакли тиббий ҳужжатлар тўпланиш жараёнида.
Қайд этилишича, боланинг соғлигини таъминлаш масаласи ҳозирда вилоят прокуратураси назоратида бўлиб, Болалар омбудсмани ҳам бу борада ўз кузатувини давом эттиради.
Изоҳ (0)