Ижтимоий тармоқда ва қатор ОАВларда тахминан 1 яшар гўдакни аёл шафқатсизларча ураётгани, яна бир лавҳада эса ана шу болани аёл билан эркак ерга кўмаётгани тасвирланган видео тарқалди. Болалар омбудсмани ҳолатга изоҳ берди.
Болалар омбудсмани мазкур видеодаги ҳолатни тегишли процессуал тартибда ўрганиши учун ҳуқуқни муҳофаза қилувчи органларга мурожаат қилган. Тегишли идораларнинг тезкор ҳамкорлигида ҳолат ўрганилиб, видеотасвирдаги маълумот асосида аёлнинг шахси идентификация қилинди.
Аниқланишича, у Андижон вилояти Жалақудуқ туманида яшовчи 1995 йилда туғилган А.Г. бўлиб, ҳозирги пайтда у (2016 йилдан бери) Россиянинг Новосибирск шаҳрида турмуш ўртоғи Б.И. билан яшаб келади. Шунингдек, видеотасвирдаги гўдак А.Г. ва Б.И.нинг 2019 йилда туғилган фарзанди Р.Х. экани аниқланди.
Мазкур ҳолат юзасидан Бош прокуратуранинг тегишли сўровига асосан Бош консулхона ҳамда Новосибирск области ИИВ ходимлари билан ўзаро тезкор маълумотлар алмашиниши натижасида 19 январь куни Б.И. ва А.Г. Бердянск шаҳрида қўлга олиниб, процессуал тартибда ҳибсга олинди.
Россия Тергов қўмитасининг Новосибирск шаҳри (Октябрьский райони) тергов бошқармаси томонидан А.Г. ва Б.И. га нисбатан Россия Жиноят кодексининг 117-моддаси (қийнаш) билан жиноят иши қўзғатилди ва ҳозирда тергов ҳаракатлари олиб борилмоқда.
Мазкур жиноят иши юритуви доирасида Ўзбекистон фуқароси бўлган вояга етмаган Р.Х. манфаатларини таъминлаш юзасидан Бош прокуратура Россия тергов қўмитаси билан ҳуқуқий ҳамкорлик чораларини давом эттирмоқда. Бу борада қўшимча равишда маълумот берилади.
Мазкур ҳолат бўйича болалар омбудсмани ўз кузатувини давом эттиради.
Изоҳ (0)