Мамлакатда умумий ўрта таълим мактаблари директорларини тайёрлаш ва лавозимга тайинлаш ҳамда уларни қўшимча рағбатлантириш бўйича янги тартиб жорий этилмоқда. Бу ҳақда 15 январь куни АОКАда ўтказилган брифингда Мактабгача ва мактаб таълими вазирлиги ахборот хизмати раҳбари Дилфуза Собирова маълум қилди.
Ўзбекистон президентининг 2023 йил 26 майдаги фармонига мувофиқ, жорий йил 1 январдан бошлаб умумий ўрта таълим муассасалари директорларини менежерлик курсларида ўқитиш ва сертификатлаш тизимини жорий этиш белгиланган. Бу жараённи амалга ошириш учун ҳукумат низом тасдиқланган.
“Унга кўра, Абдулла Авлоний номидаги миллий-тадқиқот институти томонидан умумтаълим мактаблар директорлари лавозимига номзодларни менежерлик ўқув курсларида ўқитиш ва махсус портал орқали уларга менежерлик сертификатини бериш тизими жорий этилмоқда. Менежерлик курсларига ўқиш учун номзодлар камида бакалавр даражасига эга бўлиши, белгиланган малака талабларига жавоб бериши керак. Таълимда менежменти мутахассислиги бўйича магистр даражасига эга бўлган номзодлар ўқув курсида ўқимасдан сертификат олиш бўйича якуний синовларида иштирок этишлари мумкин. Таълимда менежмент ихтисослиги бўйича илмий даражага эга бўлган номзодлар учун сертификат уларнинг аризасига асосан тўғридан-тўғри берилади”, — деди Дилфуза Собирова.
Қўшимча қилишича, номзодлар (тингловчилар) замонавий бошқарув, жамоада ишлаш, ота-оналар билан мулоқот қилиш, молиявий саводхонлик ва ахборот-коммуникация технологиялари кўникмалари бўйича ўқитилади. Ўқув курсларининг давомийлиги 144 соат бўлиб, бир ой давом этади.
Ўқув машғулотлари назарий, амалий ва мактаб амалиётидан иборат бўлади. Назарий ва амалий машғулотлар институтда, амалиёт эса мактаб ҳамда таълим бошқаруви идораларида ўтказилади.
Тренинг машғулотлари таълим менежменти бўйича касбий салоҳияти юқори бўлган профессор-ўқитувчилар билан бирга бугунги кунда таълим сифати, замонавий бошқарув орқали мактабда ижодий соғлом муҳитни ярата олган амалиётчи мактаб директорлари томонидан интерактив усулларда олиб борилади.
Ўқув курсларини муваффақиятли тугатган номзодлар иштирокида якуний синовлар ўтказилади ҳамда ундан муваффақиятли ўтган номзодларга сертификат берилади.
Менежерлик сертификати электрон рақамли имзо билан тасдиқланган ва QR-код қўйилган ҳолда электрон шаклда берилади ҳамда сертификат 5 йил давомида амал қилади.
Менежерлик сертификатига эга бўлган номзодлар орасидан мактаб директори лавозимига номзодлар захираси шакллантирилади. Эндиликда номзодлар фақат сертификат мавжуд бўлган ва мазкур номзодлар захирасига киритилган кадрлар орасидан танлаб олинади.
2024 йил 1 сентябрдан бошлаб менежерлик сертификатига эга бўлган мактаб директорларига (ушбу сертификатнинг амал қилиш муддати давомида) лавозим маошининг 50 фоизи, мактаб директори ўринбосарларига 30 фоиз миқдорида ҳар ойлик қўшимча устамалар тўланади.
Умумтаълим мактабларида фаолият юритаётган директорлар ҳар 5 йилда бир марта менежерлик сертификатини олиши талаб этилади ва сертификатга эга бўлган директорлар уни олган йилдан бошлаб уч йил давомида малака ошириш курсларидан озод этилади.
“Шу ўринда таъкидлаб ўтиш жоизки, менежерлик курсларида номзодлар шартнома асосида жалб этилади. Амалдаги мактаб директорларини менежерлик курсида ўқитиш харажатлари бюджет маблағлари ҳисобидан молиялаштирилади. Мактаб директорларининг ўқиш даврида уларнинг асосий иш жойи бўйича лавозими ва амалдаги ўртача иш ҳақи миқдорлари сақлаб қолинади, хизмат сафари билан боғлиқ харажатлар асосий иш жойидан тўланади” — деди Дилфуза Собирова.
Менежерлик сертификатига эга бўлиш талаби қуйидаги таълим муассасалари директори лавозимларига нисбатан татбиқ этилмайди:
- Президент, ижод ва ихтисослаштирилган мактаблар;
- жисмоний, ақлий, сенсор ёки руҳий нуқсонлари бўлган болалар учун ихтисослаштирилган таълим муассасалари;
- санаторий туридаги ихтисослаштирилган давлат таълим муассасалари;
- ихтисослаштирилган мактаб-интернатлар ва ихтисослаштирилган мактаблар;
- алоҳида шароитларда таъминлаш, тарбиялаш ва таълим беришга муҳтож болалар учун ихтисослаштирилган мактаблар.
Эслатиб ўтамиз, жорий йилнинг 16 январидан бошлаб менежерлик курсида таълим олиш учун номзодларни рўйхатга олиш бошланади. Бунинг учун номзодлар махсус портал (manager.uzedu.uz) орқали рўйхатдан ўтиб, курсларда иштирок этиш учун ариза юборишлари талаб этилади. Менежерлик курслари 2024 йил 1 февралдан бошланади.
Изоҳ (0)