Бугун, 15 декабрь куни Тошкент шаҳрида Мактабгача ва мактаб таълими вазирлиги томонидан “Директорлар кенгаши” аъзолари учун семинар-тренинг ташкил этилди. Бу ҳақда “Дарё” мухбири хабар берди.
Тадбирда айтилишича, янги тузилган “Директорлар кенгаши” Қорақалпоғистон, вилоятлар ва Тошкент шаҳридаги энг тажрибали мактаб директорларини ўзида жамлаган. Кенгаш умумий ўрта таълим муассасалари директорларини лавозимига тайинлаш бўйича тавсия берадиган орган вазифасини бажаради.
.jpg)
Семинарда мактабгача ва мактаб таълими вазири Ҳилола Умарова иштирок этиб, мазкур кенгашни тузишдан мақсад ҳақида гапирди.
“Шу кунгача мактаб директорларини тайинлаш ва уларни ўқитиш бўйича бирор-бир шаффоф тизим бўлмаган. Очиғи, мактаб директорларини лавозимга тайинлашда турли гап-сўзлар, коррупциявий ҳолатлар бор. Шуларни таҳлил қилиб, 2024 йилдан мактаб директорларини тайёрлаш, ўқитиш, сертификатлаш ҳамда лавозимга тайинлашда очиқликни таъминлаш тизимига ўтамиз. Албатта, бу осон бўлмайди. “Директорлар кенгаши” аъзоси бўлиш катта масъулият. Бу тизим биринчи марта жорий этилмоқда. Кенгаш қатор ютуқларга эришган, салоҳиятли раҳбарлардан тузилди. Биз таълим тизимини тушунган инсонгина жон куйиб, тизимга мос кадр танлай олади, деган фикрдамиз. Кенгаш тузишдан мақсад ҳам шу”, — деди вазир.
Тадбирда январь ойидан бошлаб мактабларга раҳбарлар тайинлаш “Директорлар кенгаши” тавсиясига асосан амалга оширилиши айтилди. Кенгаш ўз фаолиятини жамоатчилик асосида юритади ва тўғридан-тўғри вазирликка ҳисоб беради. Унинг аъзолари сони ҳудуддаги мактаблар сонидан келиб чиқиб, директорлар орасидан 7 нафардан 11 нафаргача белгиланади. Кенгаш аъзолари меҳнатга ҳақ тўлашнинг энг кам миқдорининг беш баробаригача рағбатлантирилади.
Вазирлик бошқарма бошлиғи Эркин Муродов “Дарё” мухбири билан суҳбатда янги ташкил этилаётган “Директорлар мактаби” тўғрисида маълумот берди.
Вазирлик тизимида раҳбар кадрлар тайёрлайдиган “Директорлар мактаби” ташкил этилмоқда. Энди бўлажак директорлар аввало, менежерлик курсида ўқитилади. Кейин уларнинг фаолияти баҳоланиб, сертификат берилади. Сертификат олган номзодгина кейинчалик директорликка тайинланади. Бундан кўзланган мақсад шуки, дуч келган одам мактабга бориб, раҳбар бўла олмасин. Яъни аввалдан мактабни бошқариш маҳоратига эга, болалар психологияси ва педагогикани биладиган инсонларни тайёрлаш учун алоҳида бир тизим яратдик”, — деди вазирлик масъули.
Маълумот учун, икки кунлик семинар давомида вазирлик масъул ходимлари ҳамда малакали тренерлар иштирокчиларга “Директорлар кенгаши”нинг мақсад ва вазифалари, фаолиятни йўлга қўйиш тартиби, таълимда лидерликнинг роли ва директорликка номзодларни танлаб олиш масалаларида тренинг машғулотлари ўтади.
Изоҳ (0)