Украина, Буюк Британия ва Шимолий Ирландия бирлашган қироллиги Киевда хавфсизлик соҳасида ҳамкорлик бўйича келишув имзолади. Ҳужжатга Украина президенти Владимир Зеленский ва Буюк Британия бош вазири Риши Сунак имзо чекди. Бу ҳақда UNIAN хабар берди.
Буюк Британия Украина билан ҳамкорлик бўйича бундай ҳужжатни имзолаган дунёдаги биринчи давлат бўлди. У Украина хавфсизлигини қўллаб-қувватлаш мақсадида Британия ва Украина ўртасидаги ҳарбий ва ноҳарбий ҳамкорликни расмийлаштиради.
Келишувга кўра, келажакда Россия ҳужуми содир бўлган тақдирда Британия Украинага тез ва кечиктирмасдан зарур ёрдам, жумладан қуруқлик, денгиз ва ҳаво ҳудудидаги тажовузни қайтариш учун замонавий қурол-яроғлар юборади.
“Бугун Европа тарихи ўзгарган кун. Украина ва Буюк Британия хавфсизлик бўйича янги ва мисли кўрилмаган келишув тузди. Бу бизнинг ҳамкорлигимиз, хусусан, Буюк Британиянинг нуфузли глобал қудрати томонидан берилган хавфсизлик кафолатлари туфайли юзага келадиган ҳақиқатдир. Агар 1991 йилдан кейин Британия ва бошқа давлатлар билан хавфсизлик кафолатларининг бундай даражасига эришилганида, Россиянинг агрессияси бўлмас эди”, — деди Зеленский.
Британия билан мазкур келишув муддати 10 йил. Бу муддат глобал лидерлар томонидан тузилган бошқа шунга ўхшаш хавфсизлик шартномалари каби узайтирилиши мумкин.
“Бирлашган Қироллик Украинанинг НАТОга қўшилишини қўллаб-қувватлаётганини ва Украина хавфсизлиги бутун Евроатлантика хавфсизлигининг бир қисми эканини тан олишини алоҳида қадрлайман. Шунинг учун ҳам тақдим этилган кафолатлар бизнинг НАТОга аъзо бўлгунимизча амал қилади”, — деб таъкидлади Зеленский.
У агар Украина НАТОга аъзоликни келишувнинг ўн йиллик муддатидан олдинроқ қабул қилса, “яратилган хавфсизлик архитектураси аслида бутун Альянснинг хавфсизлик тизимига киритилади”.
Зеленскийнинг аниқлик киритишича, Украина Британия билан барча соҳаларда: қуруқликда, ҳавода, денгизда ва киберкосмосда, кенг сиёсий ўзаро ҳамкорлик ва қуроллар бўйича хавфсизлик борасида келишиб олган. Унинг сўзларига кўра, агар керак бўлса, Украина ва Буюк Британия қўшимча соҳавий келишувлар тузиши мумкин.
Зеленский Украина ва Буюк Британиянинг умумий вазифаси аввало Россия агрессиясини тўхтатиш ва Украинани мустаҳкамлаш, кейин эса биргаликда Украинага ҳеч қачон такрор ҳужум бўлмаслигини таъминлаш эканини таъкидлади.
“Британия раҳбарияти бошқалардан олдинда ва керак бўлганда ёрдам беради. Энди биз биргаликда хавфсизлик соҳасида ҳамкорликнинг глобал миқёсдаги муҳим намунасини яратдик”, — дея қўшимча қилди Зеленский.
Унинг айтишича, Британия билан келишув Украинанинг бошқа ҳамкорлари билан ҳам худди шундай иш олиб бориш учун асос бўлади. Зеленский бугун айнан нимага эришилгани ҳақида ҳам гапирди.
“Биз Украинани ҳар йили қўллаб-қувватлашга келишиб олдик. Хусусан, молиявий кўмак 2024 йил учун 2,5 миллиард фунт стерлинг. Ёрдам кўрсатиш кейинги йилларда ҳам давом этади. Бу келишув эса 10 йилга мўлжалланган. Бунинг шарофати билан хавфсизлик даражасига эришамиз, бу Россия агрессиясини тўхтатишга ёрдам беради”, — деди Украина президенти.
Изоҳ (0)