АҚШ собиқ президенти Дональд Трампнинг эҳтимолий қайта сайланиши Европага таҳдид солади. Бу ҳақда Европа Марказий банки раҳбари Кристин Лагард France 2 телеканалига берган интервьюсида огоҳлантирди.
“Агар тарихдан, яъни Трамп ўз мандатининг дастлабки тўрт йилида олиб борган сиёсатидан сабоқ олмоқчи бўлсак, бу аниқ таҳдид”, — деди Лагард.
У Трампнинг савдо тарифлари, НАТОга содиқлиги ва иқлим ўзгаришига қарши кураш бўйича таклиф қилган сиёсатини эсга олишни таклиф қилди.
“Камида мана шу учта соҳада Америка манфаатлари ўтмишда Европа манфаатларига мос келмаган”, — деди Европа Марказий банки раҳбари.
Шу билан бирга, Лагард Трампнинг қайта сайланиши АҚШнинг Украинани қўллаб-қувватлашига таъсир ўтказмаслигига ишонишини қўшимча қилди.
“АҚШ Конгрессида Россиянинг Украинага қарши олиб бораётган шафқатсиз урушига қаттиқ қарши бўлган, Украинани молиялаш ва қўллаб-қувватлашда давом этадиган бир қанча аъзолар бор”, — деди Лагард.
Изоҳ (0)