Ижтимоий тармоқларда тарқалаётган “туғилишлар статистикасидаги қарама-қаршиликлар” мавзуси муҳокамаларга сабаб бўлмоқда. Ҳолатга Адлия вазирлиги матбуот хизмати ойдинлик киритди.
Адлия вазирлиги томонидан 4 январь куни 2023 йил давомида ФҲДЁ органлари томонидан қайд этилган туғилишлар сони юзасидан статистик маълумотлар эълон қилинган. Унда 968 140 та туғилиш ҳолати қайд этилгани келтирилган. Вазирлик матбуот хизматининг билдиришича, мазкур маълумотлардаги туғилишлар сони 2022 йилга нисбатан “кўпайган” сўзи техник хатолик сабабли “камайган” сўзига алмашиб қолган. Ҳозирда ушбу хатолик бартараф этилган.
Статистика агентлиги маълумотларида 2023 йилда Ўзбекистонда 961 962 та тирик туғилиш қайд этилган. Яъни Адлия вазирлиги келтирган туғилишлардан фарқ 6178 тани ташкил этди.
Қайд этилишича, Адлия вазирлиги ва Статистика агентлиги туғилишлар бўйича битта манбадан фойдаланади. Адлия вазирлиги томонидан ФҲДЁ органлари томонидан бир йил давомида қайд қилинган жами туғилишлар маълумотлари юритилса, Статистика агентлиги фақатгина тирик туғилган болалар сони ҳақидаги маълумотларни эълон қилиб боради.
Изоҳ (0)