Жиззахда юз берган ЙТҲда икки нафар прокуратура ходими ҳалок бўлди 

Жиззахда содир бўлган ЙТҲда икки нафар прокуратура ходими ҳалок бўлди. Бу ҳақда Бош прокуратура матбуот котиби Ҳаёт Шамсутдинов “Дарё”га маълум қилди.

Қайд этилишича, 18 март куни соат 23:00 ларда Зомин тумани прокурорининг ёрдамчиси лавозимида иш ўрганувчи Э.К. Lacetti русумли автомашинани бошқариб кетаётиб, Супа—Зомин йўналишининг 26-километрида йўлнинг ўнг четидаги дарахтга урилиши оқибатида йўл-транспорт ҳодисасини содир этган.

Оқибатда Э.К. ва автомашина салонида бўлган Зомин тумани прокуратураси иш юритувчиси А.Қ. олган тан жароҳатлари натижасида воқеа жойида вафот этган. Туман прокуратураси терговчиси Д.З. тан жароҳатлари билан туман тиббиёт бирлашмасига ётқизилган.

Мазкур ҳолат юзасидан вилоят прокуратураси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми “а” банди билан жиноят иши қўзғатилиб, дастлабки тергов ҳаракатлари олиб борилмоқда.