2021 йилнинг апрелида Бош прокуратуранинг 33 ёшли ходими Самир Раҳмонов иш вақтида юрак хуружи сабаб вафот этганди. Ноябрда эса унинг отаси қонунда белгиланган тартибда нафақа пуллари тўлаб берилмагани учун Бош прокуратура устидан судга мурожаат қилганди.
Ўшанда иш Тошкент шаҳар фуқаролик ишлари бўйича судлов ҳайъатида кўриб чиқилган ва марҳумнинг отаси боқувчисини йўқотганлик учун нафақа олиш ҳуқуқига эга эмаслиги аниқланганди. Иш биринчи инстанция судига марҳумнинг турмуш ўртоғи иштирокида кўриб чиқиш учун юборилган эди. Тошкент шаҳар судлари матбуот хизматининг хабар беришича, Самирнинг отаси — А.Раҳмонов вафот этгани сабабли суднинг 2022 йил 10 мартдаги ажрими билан унинг даъво аризаси иш юритувидан тугатилган.
Суднинг ташаббуси билан даъвогар томонидан мустақил талаб билан арз қилувчи учинчи шахс сифатида жалб қилинган Н.Раҳмонова (турмуш ўртоғи) судга жавобгар Бош прокуратурага нисбатан турмуш ўртоғининг иш жойида вафоти муносабати билан вояга етмаган фарзандлари ва ўзи учун нафақа, суғурта товони ва маънавий зарар ундириш тўғрисидаги даъво аризаси билан мурожаат қилган.
Фуқаролик ишлари бўйича Миробод туманлараро судининг 2022 йил 28 мартдаги ҳал қилув қарорига асосан Н.Раҳмонованинг даъво талаблари қисман қаноатлантирилган.
«Жавобгардан Н.Раҳмонованинг фойдасига 951 миллион 275,9 минг сўм миқдорида бир йўла тўланадиган нафақа пули ва 20 миллион сўм миқдорида маънавий зарар ундирилиши ҳамда давлат фойдасига 76 миллион 642 минг сўм давлат божи тўланиши белгиланди», — дейилади хабарда.
Изоҳ (0)