Исроил Ғазо секторидан ўз қўшинларининг бир қисмини олиб чиқади. Бу ҳақда Исроил мудофаа кучлари қўмондонлигининг 2023 йил 31 декабрдаги баёнотига таяниб, The Times of Israel газетаси ёзди.
Нашр маълумотларига кўра, Исроил армияси Ғазо секторидан бешта бригадани олиб чиқишни режалаштирмоқда: одатда ҳарбий хизматчиларни тайёрлайдиган учта бригада ҳамда захирадаги иккита бригада.
Reuters агентлиги ҳарбий доиралардаги исми ошкор этилмаган суҳбатдошига таяниб, Исроил армиясининг захирадаги аскарлари мамлакат иқтисодиётини қўллаб-қувватлаш учун тинч ҳаётга қайтиши кераклигини тушунтирди. Ғазо секторидан олиб чиқиб кетилган ҳарбий хизматчиларнинг яна бир қисми Ливанда очилиши мумкин бўлган иккинчи фронтга тайёргарликни бошлайди.
Reuters манбасига кўра, Исроилнинг Ғазо секторида ҲАМАСга қарши уруши янги босқичга ўтмоқда, у камида олти ой давом этади.
The Times of Israel газетаси 1 январдаги Исроил армияси баёнотига таяниб қайд этишича, уруш бошланганидан кейин эвакуация қилинган Ғазо сектори билан чегарадош Исроил ҳудудлари аҳолиси яқин орада уйига қайтиши мумкин бўлади, чунки минтақа шимолида жанглар нисбатан камайган.
Эслатиб ўтамиз, Исроил—Фаластин можароси авж олгандан бери 22 мингдан ортиқ фаластинлик ҳалок бўлди. Исроилда қурбонлар сони 1 400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.
Изоҳ (0)