Жанубий Корея мухолифати етакчиси оммавий тадбир вақтида пичоқланди (видео)

Жанубий Кореянинг асосий мухолифатдаги “Тобуро” демократик партияси раиси Ли Чже Мён 2 январь, сешанба куни оммавий тадбир вақтида пичоқланди.

Пусандаги янги аэропорт қурилишида журналистлар билан суҳбатлашаётган сиёсатчининг ёнига дастхат олиш учун келган тахминан 50-60 ёшлардаги номаълум эркак тўсатдан унинг бўйнига пичоқ урган.

Yonhap агентлиги хабарига кўра, ҳужумчи воқеа жойида қўлга олинди.

Ҳодиса вақтида олинган суратларда Жанубий Корея мухолифати етакчиси атрофида оломон тўпланиб, кўзлари юмилган ҳолда ерда ётгани, унинг бўйнига рўмолча босишаётган акс этган. Маҳаллий ОАВ хабар беришича, Ли қон кетаётган бўлса-да, ҳушини йўқотмаган. Биринчи тиббий ёрдам кўрсатилгандан сўнг, у касалхонага етказилган.

Жанубий Корея президенти Юн Сок Ёл тезкор тергов ўтказишни буюрди ва Лини қўллаб-қувватлашини билдирди, дейилади президент идораси баёнотида.

Соннам шаҳрининг собиқ мери Ли Чже Мён “Тобуро” демократик партиясини 2022 йилнинг ўрталаридан бери бошқариб келади. У 2022 йил март ойида бўлиб ўтган президентлик сайловида Юн Сок Ёлга ютқазган.