Шавкат Мирзиёев ва Туркман халқининг миллий етакчиси, Туркманистон Халқ маслаҳати раиси Гурбангули Бердимуҳамедовнинг телефон орқали мулоқоти бўлиб ўтди. Бу ҳақда Президент матбуот хизмати хабар берди.
Қайд этилишича, суҳбат аввалида Ўзбекистон президенти ва Туркман халқининг миллий етакчиси, Туркманистон Халқ маслаҳати раиси бир-бирини яқинлашиб келаётган Янги йил байрами билан дилдан қутлаб, қардош халққа тинчлик-осойишталик, фаровонлик ва равнақ тилакларини билдирган.
Давлат раҳбари Туркманистон президенти Сердар Бердимуҳамедовга ўзининг самимий саломи ва энг эзгу тилакларини йўллаган.
Ўзбекистон билан Туркманистон ўртасидаги дўстлик, яхши қўшничилик ва чуқурлашган стратегик шериклик муносабатларини янада ривожлантиришнинг долзарб масалалари муҳокама қилинган. Илгари эришилган, шу жумладан парламентлараро мулоқот доирасидаги келишувлар ижросининг бориши муҳокама қилинган.
Томонлар барча устувор йўналишларда ўзаро манфаатли ҳамкорлик сезиларли фаоллашганини катта мамнуният билан қайд этган.
“Ўзаро савдо ҳажми ошмоқда – 2023 йил якуни билан товар айирбошлаш 1 миллиард доллардан ортади. Пойтахт Тошкент ва Ашхобод шаҳарларида савдо уйлари очилди, биргаликда Шовот—Тошовуз чегараолди савдо зонасини барпо этиш бўйича ишлар давом этмоқда”, — дейилади хабарда.
Саноат, энергетика, қишлоқ хўжалиги, транспорт соҳаларида икки мамлакат етакчи корхоналарининг кооперацияси кучаймоқда, ҳудудлараро алоқалар кенгаймоқда. 2023 йилда Ҳукуматлараро комиссия ва Ишбилармонлар кенгашининг навбатдаги йиғилишлари муваффақиятли ўтказилган.
Қўшма маданий-гуманитар тадбирлар, шу жумладан Маданият кунлари ва ижодий жамоаларнинг сафарлари ўтказилмоқда.
Шунингдек, Марказий Осиёдаги минтақавий ҳамкорликнинг амалий жиҳатлари юзасидан ҳам фикр алмашилган. 2024 йилга мўлжалланган учрашувлар режаси кўриб чиқилган.
Эслатиб ўтамиз, август ойида Шавкат Мирзиёев Ашхобод шаҳрида туркман халқининг миллий етакчиси, Туркманистон Халқ Маслаҳати раиси Гурбангули Бердимуҳамедов билан учрашув ўтказганди.
Изоҳ (0)