Shavkat Mirziyoyev va Turkman xalqining milliy yetakchisi, Turkmaniston Xalq maslahati raisi Gurbanguli Berdimuhamedovning telefon orqali muloqoti bo‘lib o‘tdi. Bu haqda Prezident matbuot xizmati xabar berdi.
Qayd etilishicha, suhbat avvalida O‘zbekiston prezidenti va Turkman xalqining milliy yetakchisi, Turkmaniston Xalq maslahati raisi bir-birini yaqinlashib kelayotgan Yangi yil bayrami bilan dildan qutlab, qardosh xalqqa tinchlik-osoyishtalik, farovonlik va ravnaq tilaklarini bildirgan.
Davlat rahbari Turkmaniston prezidenti Serdar Berdimuhamedovga o‘zining samimiy salomi va eng ezgu tilaklarini yo‘llagan.
O‘zbekiston bilan Turkmaniston o‘rtasidagi do‘stlik, yaxshi qo‘shnichilik va chuqurlashgan strategik sheriklik munosabatlarini yanada rivojlantirishning dolzarb masalalari muhokama qilingan. Ilgari erishilgan, shu jumladan parlamentlararo muloqot doirasidagi kelishuvlar ijrosining borishi muhokama qilingan.
Tomonlar barcha ustuvor yo‘nalishlarda o‘zaro manfaatli hamkorlik sezilarli faollashganini katta mamnuniyat bilan qayd etgan.
“O‘zaro savdo hajmi oshmoqda – 2023-yil yakuni bilan tovar ayirboshlash 1 milliard dollardan ortadi. Poytaxt Toshkent va Ashxobod shaharlarida savdo uylari ochildi, birgalikda Shovot—Toshovuz chegaraoldi savdo zonasini barpo etish bo‘yicha ishlar davom etmoqda”, — deyiladi xabarda.
Sanoat, energetika, qishloq xo‘jaligi, transport sohalarida ikki mamlakat yetakchi korxonalarining kooperatsiyasi kuchaymoqda, hududlararo aloqalar kengaymoqda. 2023-yilda Hukumatlararo komissiya va Ishbilarmonlar kengashining navbatdagi yig‘ilishlari muvaffaqiyatli o‘tkazilgan.
Qo‘shma madaniy-gumanitar tadbirlar, shu jumladan Madaniyat kunlari va ijodiy jamoalarning safarlari o‘tkazilmoqda.
Shuningdek, Markaziy Osiyodagi mintaqaviy hamkorlikning amaliy jihatlari yuzasidan ham fikr almashilgan. 2024-yilga mo‘ljallangan uchrashuvlar rejasi ko‘rib chiqilgan.
Eslatib o‘tamiz, avgust oyida Shavkat Mirziyoyev Ashxobod shahrida turkman xalqining milliy yetakchisi, Turkmaniston Xalq Maslahati raisi Gurbanguli Berdimuhamedov bilan uchrashuv o‘tkazgandi.
Izoh (0)