Жиззахдаги бошланғич синф ўқитувчиси Рўзигул Орзиқулова Сенат томонидан ўтказилган “Йил аёли” миллий-кўрик танлови ғолиби бўлди. 23 декабрь куни Тошкентда ғолибларни тақдирлаш маросими бўлиб ўтди.
Танловнинг республика босқичида олий ўрин — Гран-при ҳамда 1, 2 ва 3-ўринни эгаллаган иштирокчилар Оила ва хотин-қизларни қўллаб-қувватлаш давлат мақсадли жамғармаси маблағлари ҳисобидан президент совғаси — автомобиль билан, қолган ғолиблар эса диплом ва пул мукофоти билан тақдирланди.
Рўзигул Орзиқулова Жиззах шаҳридаги 26-умумтаълим мактабининг бошланғич синф ўқитувчиси. Унга Chevrolet Onix автомобили топширилди.
“Қарийб ярим асрлик умрини устозлик касбига бахшида этаётган устознинг бу ғалабаси барча таълим соҳасида фаолият олиб бораётган педагогларимиз меҳнатининг яна бир муносиб эътирофи дейиш мумкин. Бу эътиборнинг замирида қанчадан қанча машаққатли меҳнат, сабр, синовлар ётишини ҳар биримиз яхши биламиз.
Давлатимиз раҳбари айтганларидек, ўқитувчининг обрўси ошса, мактабнинг обрўси ошади, илмнинг, таълим-тарбиянинг қадри кўтарилади. ‘Йил аёли’ танловида ҳам айнан ўқитувчимизнинг мутлақ ғолиб сифатида эътироф этилиши айнан шу сўзларнинг ҳаётий тасдиғидир”, — дея фикр билдирди мактабгача ва мактаб таълими вазири Ҳилола Умарова.
Маълумот учун, “Йил аёли” кўрик-танлови мамлакатни ижтимоий-иқтисодий ривожлантиришга салмоқли ҳисса қўшаётган, турли соҳаларда меҳнат қилаётган, оилада ва фарзанд тарбиясида ўрнак бўлаётган аёлларни қўллаб-қувватлаш, фаоллик кўрсатиш мақсадида ҳар йили ўтказиб келинмоқда.
Мазкур танловда мулкчилик шаклидан қатъий назар корхона, ташкилот, муассасаларда меҳнат қилаётган аёллар, ҳатто уй бекалари ҳам иштирок этиши мумкин.
Изоҳ (0)