Jizzaxdagi boshlang‘ich sinf o‘qituvchisi Ro‘zigul Orziqulova Senat tomonidan o‘tkazilgan “Yil ayoli” milliy-ko‘rik tanlovi g‘olibi bo‘ldi. 23-dekabr kuni Toshkentda g‘oliblarni taqdirlash marosimi bo‘lib o‘tdi.
Tanlovning respublika bosqichida oliy o‘rin — Gran-pri hamda 1, 2 va 3-o‘rinni egallagan ishtirokchilar Oila va xotin-qizlarni qo‘llab-quvvatlash davlat maqsadli jamg‘armasi mablag‘lari hisobidan prezident sovg‘asi — avtomobil bilan, qolgan g‘oliblar esa diplom va pul mukofoti bilan taqdirlandi.
Ro‘zigul Orziqulova Jizzax shahridagi 26-umumtaʼlim maktabining boshlang‘ich sinf o‘qituvchisi. Unga Chevrolet Onix avtomobili topshirildi.
“Qariyb yarim asrlik umrini ustozlik kasbiga baxshida etayotgan ustozning bu g‘alabasi barcha taʼlim sohasida faoliyat olib borayotgan pedagoglarimiz mehnatining yana bir munosib eʼtirofi deyish mumkin. Bu eʼtiborning zamirida qanchadan qancha mashaqqatli mehnat, sabr, sinovlar yotishini har birimiz yaxshi bilamiz.
Davlatimiz rahbari aytganlaridek, o‘qituvchining obro‘si oshsa, maktabning obro‘si oshadi, ilmning, taʼlim-tarbiyaning qadri ko‘tariladi. ‘Yil ayoli’ tanlovida ham aynan o‘qituvchimizning mutlaq g‘olib sifatida eʼtirof etilishi aynan shu so‘zlarning hayotiy tasdig‘idir”, — deya fikr bildirdi maktabgacha va maktab ta'limi vaziri Hilola Umarova.
Ma’lumot uchun, “Yil ayoli” ko‘rik-tanlovi mamlakatni ijtimoiy-iqtisodiy rivojlantirishga salmoqli hissa qo‘shayotgan, turli sohalarda mehnat qilayotgan, oilada va farzand tarbiyasida o‘rnak bo‘layotgan ayollarni qo‘llab-quvvatlash, faollik ko‘rsatish maqsadida har yili o‘tkazib kelinmoqda.
Mazkur tanlovda mulkchilik shaklidan qat’iy nazar korxona, tashkilot, muassasalarda mehnat qilayotgan ayollar, hatto uy bekalari ham ishtirok etishi mumkin.
Izoh (0)