Ўзбекистонда режага нисбатан 107 фоиз дарахт кўчатлари экилиши таъминланди  

Ўзбекистон ҳудудларида 91 млн туп, яъни режага нисбатан 107 фоиз дарахт кўчатлари экилиши таъминланди. 

Бу ҳақда АОКАда ўтказилган брифингда Экология, атроф-муҳитни муҳофаза қилиш ва иқлим ўзгариши вазирлиги ахборот хизмати раҳбари Лола Раҳмонбоева маълум қилди. Мамлакат миқёсида оммавий кўчат экиш тадбирлари амалга оширилгани натижасида яшил ҳудудлар кўпайишига эришилмоқда.

Тошкент вилояти Бўстонлиқ туманининг тоғ ва тоғолди ҳудуди 580 гектар майдонида вазирликлар, идоралар ва тижорат банклари, Тошкент вилояти ва Тошкент шаҳар ҳокимликлари томонидан 320 минг туп турли хилдаги манзарали, мевали дарахт кўчатлари экилиб, янги боғлар барпо этилмоқда.

Мавжуд 196 та чиқинди полигонлари атрофида тез ўсувчи дарахт турларидан ихота дарахтзорлари барпо этиш лойиҳаси ишлаб чиқилиб, ҳозирги кунда 182 минг туп дарахт кўчатлари экилди. Атроф-муҳитга таъсир хавфи I ва II тоифадаги саноат корхоналари томонидан “яшил белбоғ”лар барпо этиш мақсадида 1 миллион 873 минг, ўрмон фонди ерларида ўрмон барпо этиш мақсадида эса 5 миллион 186 минг туп дарахт кўчатлари экилди.

Суғориш тизимлари билан таъминлаш мақсадида ҳудудларда 893 та сув чиқариш қудуқлари қазилди ва 1058,7 км узунликда суғориш тизимлари жорий этилиб, сув манбаси бўлмаган ҳудудларга кўчатларни суғориш учун 610 та махсус техникалар жалб этилди. 

Жорий йил кузги мавсумда Ўрмон хўжалиги агентлиги томонидан ҳар бир маҳаллага 200 тупдан — жами 2 миллион туп, мактабгача таълим муассасаларига 836 минг туп, Экология вазирлиги томонидан соғлиқни сақлаш муассасаларига 900 минг туп кўчатлар бепул етказиб берилди.